Giň sähralar, boz meýdanlar, depeler,

Köňlümiň aramy, joşy, Garagum.

Gudratly çägäňde melhem tapylar,

Hassa göwünlere şypa, Garagum.

Ençe eýýam, ençe heňňamlar aşyp,

Oguz kowmy gursagyňda ornady.

Dutaryň owazy depeler aşyp,

Gör, niçe bagşylar sende saýrady.

Ilki baran düşünmeýär hiç zada,

Pikir edýär ümsüm ýatan çägelik.

Emma, diň salaňda ene topraga,

Ýüregiňde hyruçlanýar çagalyk.

Gör, nähili hezil, neneň şadyýan,

Lowurdaýan mele çölüň gursagy.

Men bir zady size anyk aýdaýyn,

Sadadyr, mähremdir çölüň adamy.

Çünki beýle mähri, türkanalygy,

Peşgeş berdi balasyna Garagum.

Biz şol çölüň ogly, çölüň perzendi,

Öýümizem, Watanmyzam Garagum.

Öwezgeldi Gylyçtaganow,

TGM-niň Harby institutynyň harby talyby.