Watan goragy – atalarymyzyň beýik taglymata öwrüp, geljek nesliň kalbynda öçmejek söýgini döreden milli duýgusydyr. Asyrlaryň jümmüşinden çeşme deý akyp gelen bu täsin duýgy halkymyzyň milletbaşysy Oguz han Türkmen tarapyndan keramata öwrülen mukaddes borç hasaplanypdyr. Bahasyny hiç zat bilen ölçäp bolmajak şeýle uly gymmatlyk 5000 ýyllyk taryhymyzyň gatlaryndan ençe döwürler aşyp, her zamananyň görnükli galamgärleriniň kömegi bilen Oguz han atamyzdan miras galan atalyk wesýet hökmünde biz ýaş nesliň kalbynda baky ornapdyr. Çünki, Milletbaşymyz tarapyndan keramat saýylýan mukaddes borja öwrülen Watan goragynyň gymmaty çuň pelsepeli beýik taglymatlarda aňladylypdyr. Bu ajaýyp çeper aňlatmalar bolsa türkmen taryhynyň her döwrüniň ussat ýazyjy-şahyrlary, taryhçylary tarapyndan özboluşly garaýyşda täzeçillik bilen beýan edilip, Oguz han atamyzdan miras galan pähim-paýhas gorunyň many-mazmun taýdan baýlaşmagyna esas döredipdir. Bu aýdyň hakykata özümiň türkmen ýigidi bolup dünýä inendigime bolan milli buýsanjymy goşalandyrýan ajaýyp eserde – milli Liderimiziň «Mertler Watany beýgeldýär» atly täsin kitabynda has-da anyk göz ýetirmeklik bolýar. Çünki, Gahryman Arkadagymyzyň biz talyp ýaşlar üçin gymmatly gollanma bolan bu ajaýyp eserinde: «Watan goragy biziň üçin heňňamlardan aşyp gelýän täsin heň bilen sazlaşýan namadyr. Watançylyk namasy bize Oguz hanyň galdyran parahatçylyk söýüjilikli pentleridir. Watançylyk namasy merdana gerçek Gorkut atanyň pähim-paýhasly tälimleridir. Watançylyk namasy Jygalybegiň iliniň serdary, türkmen ojagynyň hany saýan eziz perzendine atalyk pendidir. Watançylyk namasy Magtymguly akyldaryň döredijilik äleminiň kuýaşydyr. Ine, şu namalar bilen ata-babalarymyz öz ogul-gyzyna ýüreginiň iň mähirli jümlelerini ýetirýär» diýip, bellän örän çuň pelsepeli täsin taglymatlaryndan ýaňa kalbyňda dörän ruhuňy galkynyş, özüňiň beýik milletiň nesli bolup eşretli durmuşda ýaşaýanlygyňa bolan çäksiz guwanjyňy gursagyňa sygdyranok. Çünki, sen ertirki günüň bagtyýar Watan goragçysy diýen mukaddes ada eýe boljak türkmen ýigidi. Milletbaşymyz Oguz han Türkmen tarapyndan keramata öwrülen beýik borjy ýerine ýetirmeklik bolsa türkmen ýigidi üçin milli buýsançdyr. Bu uly buýsanjy men döwlet Garaşsyzlygymyzyň şanly 28 ýyllyk baýramçylygy mynasybetli geçirilen harby ýörişe tomaşaçy bolup gatnaşan wagtym has içgin başdan geçirdim. Watan goragçylarynyň ýurdumyzyň döwlet Tugy hem-de söweşjeň baýdaklary bilen nyzam boýunça harby ýörişden dürli hili täsin harby tilsimleri bilen geçen pursadyny synlan mahalym özümiňem şu merdana türkmen ýigitleri ýaly ertirki günüň Watan goragçysydygyma, şolaňky ýaly ajaýyp harby lybasy geýmeklik bagtyna, harby ýörişden ata-baba aňyrdan gaýdýan milli harby tälimlerimiz bilen geçmeklik wagtyna eýe boljakdygyma bolan milli buýsanç kalbymy täsin duýgular bilen gaplap aldy. Ana, şondan soň, men Watan goragy diýen mukaddes düşünjäniň türkmen ýigitleriniň ata-baba ganynda bardygyna, bu täsin duýgunyň olaryň damarynda gaýnap, kalbynda mukam bolup ýaňlanýandygyna bolan durmuş hakykatyna öz mysalymda anyk-aýdyň göz ýetirdim. Çünki, men nesip bolsa ýokary okuw jaýyny üstünlikli tamamlap, Watan goragyna gidip, ata ýurduma, il-günüme, hormatly Prezidentimize, Türkmenistanyň Ýaragly Güýçleriniň belent Serkerdebaşysyna, harby kasama wepaly bolup gulluk etjekdigim baradaky milli buýsanç bilen ýaşaýaryn.

 Baky Nurmuhammedow,

Magtymguly adyndaky TDU-nyň talyby.