Häzirki döwürde Türkmenistanyň Prezidenti Gurbanguly Berdimuhamedowyň ýolbaşçylygynda ata-babalarymyzyň parahatçylyk söýüjilikli ýol-ýörelgesini dowam edýän Türkmenistan dünýäde parahatçylygy gorap saklamak, hoşniýetli dost-doganlyk gatnaşyklaryny pugtalandyrmak barada giň gerimli başlangyçlary bilen yzygiderli çykyş edýär. Hormatly Prezidentimiz tarapyndan kabul edilen Garaşsyz, hemişelik Bitarap Türkmenistanyň Harby doktrinasy goranyş häsiýetli bolup, ýurdumyzda parahatçylygy gorap saklamak, harby howpsuzlygy üpjün etmek bilen birlikde, ählumumy howpsuzlyga we parahatçylyga pugta hem-de yzygiderli eýermegiň sazlaşykly utgaşdyrylmagyny göz öňünde tutýar. Harby doktrinada Türkmenistanyň hemişelik Bitaraplygy hakyndaky dünýä döwletleri tarapyndan ykrar edilen halkara hukugyna laýyklykda, daşary syýasatda hemişelik oňyn bitaraplyk, döwletleriň özygtyýarlygyna, çäkleriniň bitewiligine we serhertleriniň bozulmazlygyna hormat goýmak, beýleki ýurtlaryň içerki işlerine gatyşmazlyk, güýç ulanmakdan, harby bloklara we birleşiklere gatnaşmakdan ýüz döndürmek, sebitdäki we dünýädäki ähli döwletler bilen parahatçylykly, dostlukly hem-de özara bähbitli gatnaşyklary ösdürmäge ýardam bermek ýörelgelerine eýerýändigi aýdyň kesgitlenendir. Garaşsyz, hemişelik Bitarap Türkmenistanyň Harby doktrinasy döwletde resmi taýdan kabul edilen, parahatçylyksöýüji daşary syýasaty ýöredýän Türkmenistanyň harby howpsuzlygyny we çäkleriniň bütewiligini üpjün etmegiň harby-syýasy, harby-ykdysady we harby-strtegik esaslaryny kesgitleýän ýörelelgeleriň, maksatlaryň we wezipeleriň ulgamydyr. Harby doktrinada Türkmenistanyň parahatçylyk söýüji daşary syýasaty ýöredýändigi aýratyn nygtalýar. Dünýädäki islendik özygtyýarly döwlet ýaly, Türkmenistanyň hem öz harby howpsuzlygyna bolup biljek daşarky we içerki wehimleriň güýçlenmegine ýol bermejekdigi kesgitlenilýär. Türkmenistan öz çäk bitewiligini gorap saklamak, köpçülikleýin gyryş ýaraglarynyň ulanylmagyna, halkara terrorçylyga we beýleki wehimlere garşy göreşmek barada umumadamzat bähbitli işleri amala aşyrmaga mynasyp goşantlaryny goşýar.

Hormatly Prezidentimiziň alyp barýan «Açyk gapylar» syýasaty netijesinde, Türkmenistan döwletimizde milli bähbitlerimize we howpsuzlygymyza, şeýle-de Birleşen Milletler Guramasynyň Tertipnamasynda kesgitlenen düzgünlere ters gelmeýän şertlerde ähli döwletler bilen deň derejede gatnaşyklary ösdürmäge zerur şertler döredildi. Türkmenistan öz çäklerinde daşary döwletleriň harby bazalarynyň ýerleşdirilmezligi, ýadro, himiki, biologik ýaraglaryň we köpçülikleýin gyryş ýaraglarynyň islendik görnüşleriniň getirilmezligi, öndürilmezligi, ýaýradylmazlygy we döwletiň çäkleriniň üstünden geçirilmezligi baradaky borçlaryna berk esaslarda eýerýär. Adamzat döräli bäri dünýä halklarynyň iň arzyly arzuwlarynyň biri, megerem, parahat ýaşamak bolan bolsa gerek. Parahatçylygyň ýok ýerinde adamlaryň abadan durmuşyny göz öňüne getirmek, asla mümkin däl. Öz başyndan ägirt uly adam pidalaryna getiren iki jahan urşuny, ululy-kiçili birnäçe uruşlary geçiren adamzat jemgyýeti XX asyryň ortalarynda tutuş dünýäde parahatçylygy berkarar etmek maksady bilen, Birleşen Milletler Guramasyny döretdi. Häzirki wagtda 200-e golaý agzasy bolan bu gurama tutuş dünýäde parahatçylygy saklamakda örän uly işleri alyp barýar. Türkmenistanyň Garaşsyzlyk ýyllarynda sebitde prahatçylygy berkarar etmekde uly işleri durmuşa geçirendigi we geçirýändigi jedelsiz hakykatdyr. Bu barada dünýä belli syýasatçylar, döwlet işgärleri, alymlar öz çykyşlarynda, ylmy işlerinde belläp geçýärler. Türkmenistanyň bitaraplyk derejesini ulanmagy ylalaşdyryjy prosesiň şowly geçmegine we oňa beýleki gyzyklanýan döwletleriň goşulmagyna ýardam etdi. Häzirki wagtda Türkmenistan döwleimiz dünýädäki islendik gapma-garşylykly ýagdaýy parahatçylyk ýoly bilen kadalaşdyrmagyň tarapdary bolup çykyş edýär. Bu ugurda tutuş dünýä we sebit ähmiýetli başlangyçlary, teklipleri öňe sürýär.

Agamyrat Orazow,

TGM-niň Harby institutynyň harby talyby.