Bu günki okuw sapaklary hem gutardy. Hemmeler gaýtdy, men bolsa okuw otagynda galyp, öňki günlerdäki ýaly döredijilik bilen meşgullanmagy ýüregime düwdüm. Ýöne näme tema boýunça boýunça makala ýazjagymy bilmeýärdim. Ahyrsoňy senenamany alyp haýsy baýramçylygyň ýetip gelýändigini görsem, «27-nji ýanwar – Watan goragçylarynyň güni» diýen ýerine gözüm düşdi. Eýsem bu güni ýatdan çykaraýmak bolarmy?! Biz tebigaty goraýjylar ýurdumyzyň tebigatyny, ýer üsti baýlyklaryny goraýarys, Watan goragçylary bolsa ýurdumyzyň asudalygyny, serhedimizi goraýar. Eýsem bu iki kär birmeşzeş dälmidir?! Men hem Watan goragçylaryň gününe bagyşlap üýtgeşik goşgy ýa-da gysga göwrümli proza eserini döredesim gelýär. Ýöne näme ýazsamkam?! Üýtgeşik goşgy ýazaýyn diýsem, men şahyr däl, makala ýazaýyn diýsem öň kän makalalar ýazyldy. Garaz, näme tema boýunça ýazjagymy bilmän pikirlenip durkam, halypa mugallymyň otaga girenini duýman galypdyryn. Ol maňa ýüzlenip «Diýar! Näme boldy, aladaly görünýäň-le?» diýdi, men hem «Mugallym, 27-nji ýanwar – Watan goragçylaryň güni ýetip gelýär. Watan goragçylarymyza bagyşlap bir üýtgeşik temada makala ýa bolmasa-da hekaýa ýazasym gelýär. Ýöne nähili meseläni beýan etjegimi bilmeýärin» diýdim. Soňra mugallymym «Watan goragçylaryň gününe bagyşlap ekolog hökmünde öz ýürek buýsanjyňy beýan etseň, gowy bolardy?» diýdi, «Sag boluň halypa, dogry aýdýaňyz» diýenimi bilmän galypdyryn. Elimdäki depderime ilki bilen gutlagyň adyny «Ekologyň Watan goragçylaryna gutlagy» diýip ýazdym. Ýöne, näme üçindir bu gutlagy ýazmak üçin tolgunýaryn.  Gutlagda käbir kemçilikleriň bolmagy mümkin, onuň üçin sizden ötünç soraýaryn. Eger-de meniň gutlagym siziň göwnüňize ýaran bolsa, meniň bu ujupsyz zähmetimiň ýerine düşdügi bolar.  Ilki bilen mähriban hem gahryman Arkadagymyzy Watan goragçylaryň 28 ýyllyk baýramçylygy bilen tüýs ýüregimden gutlaýaryn! Biz talyp ýaşlara okamaga, öwrenmäge döredip berýän mümkinçilikleri üçin hormatly Prezidentimiziň janynyň sag, ömrüniň uzak bolmagyny, tutýan tutumly işleriniň mundan-da beýläk rowaç bolmagyny arzuw edýärin.   

Baýramyňyz gutly bolsun, mähriban ildeşler!

Mähriban Watan goragçylary! Men siziň durmuşyňyz asuda Asmanymyz ýaly arassa bolmagyny, ene topragymyz ýaly geçirimli, suw ýal päk ýürekli, ösümlikleriň adamzada gerek bolşy ýaly ýurdumyza gerekli ynsanlar bolmagyňyzy, sözen ösümligi ýaly çydamly, çigildem ýaly durmuşyňyzyň owadan bolmagyny, sazak ýaly mert, dagdan ýaly gaýduwsyz bolmagyňyzy arzuw edýärin. Siziň bu asylly, mukaddes käriňizde uly üstünlikleriň ýar bolmagyny, maşgala ojagyňyzda bolsa elmydama çaga sesleriniň ýaňlanyp durmagyny tüýs ýüregimden arzuw edýärin!

Diýar Yhtyýarow,

Magtymguly adyndaky TDU-nyň talyby.