Näme sebäpdendigini bilemok, emma her gezek gyş pasly gelende ykbalyň bize nesip eden gysga wagtlyk menzil tanapyny külterländigimize garamazdan, ýanýoldaşym Amanyň oglum Merede ömrüniň soňky pursatlarynda aýdan wesýetleri hyýalymda janlanýar. Maşgalamyz bilen bile geçiren günlerimiz ylla sessiz kinofilmiň görnüşleri ýaly göz öňümden geçip başlaýar. Bu gün hem şeýle boldy. Oglum Myrat bilen gyzym Jereni ýatyranymdan soň, Watan öňündäki gulluk borjuny ýerine ýetirip ýören nowjuwan oglum Meret hakyndaky oýlanmalar elime galam almagyma sebäp boldy.

Salam, eziz balam, nowjuwan perzendim! Kakaň aýdan sözleri ýadyňdamy: «Jandan eziz görýän Watanymyza arzyly behişdiň Zemindäki parçasy deý togap et! Sen meniň «Ömür» atly bagymyň miwesisiň! Ejeň we doganlaryň arkadagysyň! Saňa guwanjym çäksizdir oglum!». Megerem bu sözler seniň durmuş pelsepäňe (idealyňa) öwrülen bolmaly. Biziň durmuşymyzda ölçäp bolýan we ölçäp bolmaýan gymmatlyklar bar... Emma hiç zat bilen deňeşdirmek, ýanaşdyrmak mümkin bolmadyk mukaddeslik munuň özi Watandyr. Harby kasamyň, seniň Watanyňa wepalylyk ähtiňdir.  Watan abraýy, Watan birligi üçin özüňden geçmäge  taýýarlygyň tekrarnamasydyr.

Oglum, özüňde şu mukaddes duýgyny terbiýelegin! Biziň Watanymyz üstünden müňlerçe ýyl geçen kuwwatly daragtdyr. Sen bolsa şol daragtyň gury, miwesiz şahasy bolman, miwe getirýän janly şahasy bolmalysyň.

Ata-babalarymyzdan galan  Watany, ene topragy gözüň göreji ýaly gorap saklamak seniň  mukaddes borjuňdyr, oglum! Aglap dünýä inenimizde, göbek ganymyzy özüne siňdiren, bizi çagalykdan apalap, ösdürip kemala getiren, şirin nazu-nygmatlary bilen ekläp saklan, hasratly günümizde köşeşdirip diňdiren, bagtly çagymyzda şemaly bilen şatlygymyzy dünýä ýaýan ene topragymyzy goramak seniň ogulluk borjuňdyr!

Eziz perzendim! Doglan we özüňi bilen ýeriňe, seni iýdiren we ösdüren halka ogullyk wepalylygyňy, kyblaň kakaň wesýetlerini amal edýändigiňe guwanýan!

Balam! Gijeleriňi gündiz edip, hüşgärligi elden berme!  Halkymyzyň güneşli gündizlerini, parahat gijelerini goraýan Watan goragçylaryna bolan belent sarpanyň we ynamyň baýramy bolan «Watan goragçylarynyň gününi» uzak ýyllar bilelikde bellemek bagty türkmen halkymyza nesip etsin! Baky barlygymyz, egsilmez baýlygymyz bolan ata Watanymyzyň binýady mizemez bolsun!

Ejeň.

Şamyrat Kürräýew,

kapitan.