Watan! Ynsan üçin ata Watan öz dogduk obasyndan, ýaşan mähriban öýünden başlanýar. Her bir ynsanyň göbek ganynyň daman ýeri, ösüp-örňäp ulalan topragy ömrüniň manysy, köňlüniň ganaty. Gyzjagaz ulalyp ulugyz, oglan ýetişip ýigit çykýar. Gözýetimi giňäp, bilim alan ýetginjek Watan sözüniň manysyna has çuň göz ýetirip başlaýar. Ýaş ýigitler Watan goragynda sak durup, her bir daban ýerini gözleriniň göreji kimin gorap, berdaşlanyp öýlerine dolanyp gelýän bolsalar, gyzlar öz döredýän keşdelerinde, haly nagyşlarynda Watan gözelliginiň waspyny özleriçe ýetirmegi başarýarlar. Öz goýnunda müňlerçe syrlary saklap oturan gadymy ýadygärliklerimizi synlap, watanperwer pederlerimiziň merdana ömür ýollary hakyndaky eserleri okap öz dogduk ýurduňa — ata Watanyňa guwanmazlyk, oňa sežde-togap etmezlik mümkin däl.

Sallançagyň bagyny aýagyna orap keşde çekip, balasyny hüwdüläp oturan eneleri, çagalar baglaryndaky bagtyýar çagalary synlamak, asuda Asmanyň, parahat Zeminiň waspyny ýetirýän guşlaryň owazyny diňlemek bagtyýarlykdan nyşan. Bu bagtyýarlyga halkymyz Gahryman Arkadagymyzyň alyp barýan ynsanperwerlige ýugrulan syýasatynyň netijesinde eýe boldy.

Ata-babalarymyzyň arzuwlan ajaýyp zamanasynda eşretli günleriň hözirini görýän mähriban halkymyz Gahryman Arkadagymyzyň öňdengörüjilik bilen alyp barýan daşary we içeri syýasatlarynyň tutuş dünýä jemgyýetçiliginiň ykrar etmeginiň şaýady bolýar. Her bir halkyň öz öçmejek taryhy, ýyllaryň pozup bilmejek şan-şöhraty bar. Gojaman taryhyň gatlarynda göwher kimin ýalkym saçan türkmen halkynyň şan-şöhratly taryhy bu günki günde hormatly Prezidentimiziň baştutanlygynda täzeden timarlanan gadymy ýadygärliklerimiziň binalarynda, türkmen halylarynyň göllerinde, bedew atlarymyzyň ýüwrükliginde, eneleriň hüwdüsinde jemlenýär.

Gahryman Arkadagymyzyň pähim-paýhasyndan dörän, Watan mukaddesligine has çuň göz ýetirmäge ýardam berýän gymmatly eserleri bu gün halkymyzyň ýan kitabyna öwrüldi. Watanperwerlikde, edermenlikde nesillerimize nusgalyk görelde bolýan türkmen Liderine bütin dünýä guwanýar. Parahatçylyk ýoly bilen ösüşleriň belentliklerini nazarlaýan ýurdumyzda çagalaryň gülküsi, eneleriň hüwdüsi, aýdym-sazyň belent owazy ýaňlanýar. Ýaňlanýan belent owaz bagtyýarlygyň ýaňy bolup, ata Watanymyzyň şan-şöhraty bolup älem aýlanýar. «Türkmenistan — Bitaraplygyň mekany» ýylyny bezejek ösüşlerdir özgerişler bagtyýarlyk mukamynyň heňi bilen, halkymyzyň halal zähmeti bilen amal ediler. Bu belent maksatly işler halkymyzyň bagtyýar durmuşda ýaşamagyna gönükdirilip, Gahryman Arkadagymyzyň badalga bermeginde durmuşa geçiriler. Biz şeýle Watanyň perzentleri! Biz bagtyýarlygyň, parahatçylyksöýüjilikli bitaraplyk taglymatynyň dabaralanýan ýurdunyň nesli!

Bagtyýarlygyň höküm sürýän, ähli ýagşy arzuwlaryň wysal bolýan  ýurdunda ýaşap, durmuşa ornaşdyrylýan halk bähbitli özgertmelere öz goşandyňy goşup, ösüşleriň gözli şaýady bolmak uly bagt. Bu bagtyň gymmatyna düşünip, Watan waspyny söýlemek, döwlet Baştutanymyzyň daşyna berk jebisleşip, ýurdy gülletmekde alyp barýan belent maksatly işlerine goşant goşmak biziň mukaddes borjumyz. Ata Watana bolan söýgimiz  biziň ertirlerimize şugla saçyp, ädimlerimize bat berýär, her bir tutumlarymyza rowaçlyk berýär. Şol rowaç ýollardan ýurdumyzy ösüşlere sary bedew bady bilen alyp barýan Gahryman Arkadagymyza halkymyzyň köňlünden çykýan alkyşlary çäksizdir. Goý, Milli Liderimiziň alyp barýan belent maksatly, halk bähbitli işleri rowaç bolsun!  Asuda Asmanyň astynda, parahat topragyň üstünde gözellikleriň gönezligi, bagtyýarlygyň mekany  bolan  mähriban Watanymyz baky berkarar bolsun!

Jumaniýaz Orazsähedow,

Türkmenistanyň Döwlet migrasiýa gullugynyň

Ahal welaýaty boýunça müdirliginiň harby gullukçysy, kapitan.