Kämillik näme? Adam nädip kämil çykýar? Durmuşda haýsy ýollar kämillige eltýär? Ine şu soraglar beýik ägirtleriň ömürboýy jogap gözläp giden soraglary. Bu sorag häzirem adamlary gyzyklandyrýar. Ussat şahyrymyz Kerim Gurbannepesowyň «Kämilleşdigimçe, meniň üçin agyr» diýşi ýaly, durmuşda kämillige ymtylýan adam agras, durmuşa, daş-töweregindäkilere hemem öz hereketlerine jogapkärli çemeleşýär. Adam kämilleşdigiçe, entek kämillik ýolunyň başyndadygyna, beýik ussatlaryň kämillik derejesine ýetmek üçin entek uzak ýollary sökmelidigine, gözýetirýär. Il arasynda «Miweli agajyň başy, aşak bolar» diýlişi ýaly, adam kämillik ýolunda uzak ýollary geçdigiçe, onuň göwni kiçelýär. Özleri hakynda aýdylýan öwgüli sözlere biparh garaýar. Çünki ol adamlar, adaty adamlara garanyňda, bu durmuşa başgaça göz bilen garaýarlar. Her bir bolup geçýän wakalardan, täsin pursatlardan bir zatlar öwrenmäge, özlerine gerekli sapagy almaga çalyşýarlar. Kämil adam, sözüni ilki seljerip, soň gürleýär. Kämillik adamyň özüni ähli nukdaýnazardan terbiýelemegi hem-de durmuşdaky ornuny tapmagydyr. Kämilligiň hiç soňy ýokdur. Kämillige ymtylýan adamlaryň iň bir göze ilýän aýratynlygam, olaryň jemgyýetçilik durmuşyna peýda getirýän işler bilen meşgullanmagydyr ýa-da olaryň köp okamagydyr. Ol adamlar, özüni gyzyklandyrýan zatlary, dünýä meşhur çeper eserleri okap, öwrenenlerini durmuşda amal etmäge çalyşýarlar. Sebäbi şu kitaplary, çeper eserleri ýazan ýazyjydyr şahyrlar biziň geçmeli kämillik ýolumyzdan geçen ussatlar. Köp kitap okaýan adam bolsa, şu ussatlaryň yzy bilen gidip, olaryň giň dünýägaraýşynyň häsiýetli aýratynlyklaryny öwrenmäge çalyşýan mahaly, özüniň kämillige tarap, ýene bir ädim ädendigini bilmän galýar. Okan, öwrenen zatlaryny durmuşda dowam etmek kämilligiň ýene bir basgançagydyr. Biziň kimdigimizi öňümizde goýan maksatlarymyz aýan edýär. Şonuň üçinem, kämillik biziň her birimiziň baş maksadymyz bolmalydyr. Biziň beýleki maksatlarymyz bolsa kämillik ugrundaky esasy gerekli serişdelerdir. Adamyň durmuşynda belli bir döwürler bolýar. Şol döwürlerde adam kämillik ugrunda örän uzak menzilleri geçýär. Şol döwürleriň biri-de kämilligiň ilkinji basgançagy bolan biziň mekdep döwrümizdir. Kämillige ymtylýan adam mugallymlary tarapyndan her bir öwredilýän sapaklary ünsli diňläp, öwrenip, şol öwrenen zatlaryny bolsa durmuşda amal etmäge çalyşmalydyr. Şeýlelik-de, kämillige ymtylýan adam, heniz mekdep döwründe kämillige tarap barýan ýoluň, ilkinji basgançagyna düşendigini duýman galýar. Kämillige ymtylmagyň we oňa ýetmegiň, ýene bir uzak menzilleriniň biri-de Watan öňündäki iki ýyl gulluk borjuňy birkemsiz berjaý etmek. Hormatly Belent Serkerdebaşymyza, Bagtyýar hem agzybir halkymyza, wepaly gulluk etmek, Garaşsyz baky Bitarap, mukaddes ata Watanymyzy, onuň her daban ýerini, gözümiziň göreji ýaly gorap saklamak hem-de oňa mynasyp perzent bolmakdyr!

Toýmyrat Gökjäýew,

TGM-niň Harby institutynyň harby talyby.