16-nji dekabrda ýurdumyzyň daşary syýasat edarasynda «Türkmenistan bilen Birleşen Milletler Guramasynyň arasynda durnukly ösüş ugrunda 2021-2025-nji ýyllar üçin hyzmatdaşlygyň çarçuwaly Maksatnamasyny» durmuşa geçirmek boýunça ýolbaşçy komitetiň birinji mejlisi geçirildi.

Mejlise ýurdumyzyň Daşary işler ministrliginiň, Maliýe we ykdysadyýet ministrliginiň ýolbaşçylary hem-de işgärleri, degişli ministrlikleriň we pudaklaýyn dolandyryş edaralarynyň 30-dan gowragynyň wekilleri, şeýle-de BMG-niň Türkmenistandaky Hemişelik utgaşdyryjysy, BMG-niň Aşgabatdaky düzüm bölekleriniň ýolbaşçylary gatnaşdylar.

***

Şeýle-de, şol gün Türkmenistanyň we Amerikanyň Birleşen Ştatlarynyň arasynda syýasy geňeşmeler wideomaslahat görnüşinde dowam etdirildi.

Hususan-da, maslahata gatnaşyjylar ynsanperwerlik temasyny ara alyp maslahatlaşdylar. Türkmenistan Amerikanyň Birleşen Ştatlary bilen adam hukuklary meseleleri boýunça işjeň hyzmatdaşlygy alyp barýar hem-de bu ugurdaky açyk gepleşikleri goldaýar.

***

16-njy dekabrda onlaýn görnüşinde «Türkmenistan – ABŞ» işewürlik geňeşiniň nobatdaky mejlisi geçirildi. Onda söwda-ykdysady hyzmatdaşlygyň esasy ugurlary ara alnyp maslahatlaşyldy.

***

Maliýe we ykdysadyýet ministrliginiň wekiliýeti Ykdysady Hyzmatdaşlyk Guramasynyň (YHG) agza döwletleriniň milli ösüş gaznasynyň ýolbaşçylarynyň onlaýn görnüşinde geçirilen birinji maslahatyna gatnaşdy.