12-nji fewralda Türkmenistanyň Prezidenti Gurbanguly Berdimuhamedow öz ýurdunyň hökümet wekiliýetine ýolbaşçylyk edip, Türkmenistana gelen Gazagystan Respublikasynyň Premýer-ministriniň birinji orunbasary Roman Sklýary kabul etdi.

Söhbetdeşligiň barşynda milli Liderimiz hem-de myhman söwda-ykdysady ulgamda hyzmatdaşlygyň geljegi barada pikir alyşdylar hem-de 2020-nji ýyl bilen deňeşdireniňde, geçen ýyl iki ýurduň arasyndaky haryt dolanşygynyň iki esse artandygyny, şunda ony mundan beýläk-de giňeltmek üçin ägirt uly mümkinçilikleriň bardygyny kanagatlanma bilen bellediler.

Söhbetdeşler söwda-ykdysady gatnaşyklary güýçlendirmegiň möhümdigine ünsi çekip, bar bolan mümkinçilikleri durmuşa geçirmegiň, özara haryt dolanyşygynyň möçberlerini artdyrmagyň, maýa goýum işjeňligini höweslendirmegiň, Türkmenistanyň hem-de Gazagystanyň işewürler toparlarynyň arasyndaky ýakyn hyzmatdaşlygy ýola goýmagyň zerurdygyny nygtadylar.