27-nji dekabrda hormatly Prezidentimiz Gurbanguly Berdimuhamedow Ministrler Kabinetiniň we Döwlet howpsuzlyk geňeşiniň şu ýyldaky iň soňky, Täze ýyl baýramynyň öň ýanyndaky bilelikdäki mejlisini geçirdi. Mejlise Aşgabat şäheriniň hem-de welaýatlaryň häkimleri hem çagyryldy.

Mejlisiň Başlygy G.Mämmedowa ýurdumyzyň kanunçykaryjy edarasynyň ýerine ýetiren işleriniň netijeleri barada habar berdi. «Türkmenistan — rowaçlygyň Watany» diýen şygar astynda geçen 2019-njy ýylyň ýurdumyzyň durmuşynda dürli syýasy, ykdysady, medeni wakalara beslenip, taryha girendigini belledi.

Mejlisiň Başlygynyň habar berşi ýaly, Türkmenistanyň hemişelik Bitaraplygynyň 25 ýyllygynyň giňden bellenilip geçilmegi mynasybetli, 2020-nji ýyly mynasyp atlandyrmak boýunça teklipler öwrenildi.

Şu mesele boýunça bilelikde geçirilen işleriň netijesinde geljek ýyly «Türkmenistan — Bitaraplygyň mekany» diýip atlandyrmak teklip edildi. Şeýle hem döwlet Baştutanymyzyň garamagyna bäsleşigiň jemleri boýunça kesgitlenen 2020-nji ýylyň nyşanynyň taslamasy hödürlenildi.

Mejlisiň dowamynda hormatly Prezidentimiz Gurbanguly Berdimuhamedow 2019-njy ýylyň jemleri barada durup geçdi.

Hormatly Prezidentimiz Gurbanguly Berdimuhamedow ýygnananlara ýüzlenip, şu ýyl Ministrler Kabinetiniň 41 mejlisiniň, Döwlet howpsuzlyk geňeşiniň 15 mejlisiniň, şeýle hem döwlet derejesinde dürli maslahatlaryň 56-synyň geçirilendigini aýtdy.

Ministrler Kabinetiniň, Döwlet howpsuzlyk geňeşiniň mejlislerinde, halkara derejesindäki duşuşyklarda çylşyrymly syýasy, ykdysady we durmuş häsiýetli derwaýys meselelere seredildi. Bu meseleler boýunça döwletimiziň Bitaraplyk hukuk ýagdaýyndan ugur alnyp, degişli çözgütler kabul edildi we resminamalara gol çekildi.