Wideomaslahat aragatnaşygy arkaly Türkmenistanyň Daşary işler ministriniň orunbasary Berdinyýaz Mätiýewiň Energiýanyň gaýtadan dikeldilýän çeşmeleri boýunça halkara agentliginiň (IRENA) baş direktory Françesko La Kamera bilen duşuşygy geçirildi.

Gepleşikleriň barşynda özara gatnaşyklaryň netijelidigi bellenildi. Türkmen tarapy Agentligiň howandarlygynda geçirilýän  halkara, sebit derejelerindäki çärelere, şol sanda IRENA-nyň Assambleýasynyň mejlislerine yzygiderli gatnaşýar.

Taraplar energiýanyň gaýtadan dikeldilýän we alternatiw çeşmeleri ulgamynda özara hyzmatdaşlygy işjeňleşdirmek barada pikir aýtdylar. Mälim bolşy ýaly,Türkmenistanda 2030-njy ýyla çenli gaýtadan dikeldilýän energetikany ösdürmek boýunça Milli strategiýa tassyklanyldy.