Täze okuw ýylynyň başlamagy mynasybetli paýtagtymyzy Aşgabadyň iri ýaşaýyş toplumlarynyň biri bolan Parahat 7/1 toplumda mekdebe çenli edaranyň ýene-de biri ulanmaga berildi. Ýaşajyk eýelerini ilkinji gezek kabul eden çagalar bagy döwlet Baştutanymyz Gurbanguly Berdimuhamedow tarapyndan bilim ulgamynda başy başlanan özgertmeleriň üstünlikli durmuşa geçirilýändiginiň, bu ulgamyň ýokary halkara ölçeglerine gönükdirilýändiginiň nobatdaky aýdyň subutnamasy boldy.

Terbiýelenjek 160 körpelere niýetlenen iki gatly döwrebap bina çagalary mekdebe taýýarlamak, olaryň okuw we döredijilik işleri bilen meşgullanmagy, sagaldyş çäreleri üçin hemme şertlere eýedir. Kompýuter we lingafon otaglary, aýdym-saz we sport zallary, iň täze enjamlar bilen enjamlaşdyryldy. Bu ýerde suwda ýüzmäge niýetlenen uly howuz hem bar. Sekiz toparyň her birinde çagalaryň doly derejede we sazlaşykly iýmitlenmegi üçin ajaýyp görnüşde gurnalan naharhana toplumy bar.