Şu günler ýurdumyzyň ýaşlarynyň durmuşynda örän tolgundyryjy, jogapkärli döwür – giriş synaglary möwsümi gyzgalaňly dowam edýär. Bu möwsümde ýokary taýýarlykly dalaşgärleriň uly toparynyň talyp bolmak arzuwy hasyl bolýar

Häzirki wagtda synaglar 2025-nji ýylda Türkmenistanyň ýokary we orta hünär okuw mekdeplerine okuwa girmek üçin resminama tabşyran dalaşgärler bilen giriş synaglaryny guramagyň we geçirmegiň Tertibi esasynda dowam edýär.

Okuwa kabul etmek boýunça giriş synaglary ýokary we orta hünär okuw mekdepleriniň ýerleşýän ýerlerinde, hünär okuw mekdepleriniň professor-mugallymlarynyň we orta mekdepleriň mugallymlarynyň işjeň gatnaşmagynda geçirilýär. Okuw dersleri boýunça giriş synaglary Türkmenistanyň orta mekdepleriniň okuw maksatnamalarynyň esasynda, degişli dil boýunça geçilýän derslerden başga ähli okuw dersleri boýunça döwlet dilinde dilden kabul edilýär. Giriş synaglarynda dalaşgärleriň zehininiň, bilim derejesiniň, gözýetiminiň we saýlan hünäri boýunça döredijilik ukybynyň adalatly ýüze çykarylyşyna jemgyýetçilik gözegçiligi amala aşyrylýar.

Ýeri gelende bellesek, şu ýyl ýurdumyzyň ýokary okuw mekdeplerine, şeýle hem mugallymçylyk, lukmançylyk we medeniýet ugurly orta hünär okuw mekdeplerine resmi iş kagyzlary 2025-nji ýylyň 14 — 27-nji iýuly aralygynda kabul edildi, maliýe-ykdysady ugurly we hojalyk hasaplaşygyndaky orta hünär okuw mekdeplerine bolsa resmi iş kagyzlary 14-nji iýuldan 18-nji awgust aralygynda kabul edilýär.

Halkara parahatçylyk we ynanyşmak ýylynda, döwlet Baştutanymyzyň gol çeken degişli Buýrugyna laýyklykda, ýurdumyzyň ýokary okuw mekdeplerine 16 müň 782 talyby, orta hünär okuw mekdeplerine bolsa 10 müň 879 adamy kabul etmek meýilleşdirilýär. Täze okuw ýylyndan ýurdumyzyň ýokary okuw mekdeplerinde hünärmen maksatnamasy boýunça 4 hünär, bakalawr maksatnamasy boýunça 5, magistr maksatnamasy boýunça 4 taýýarlyk ugry açylýar.

Şu ýyl sanly ulgamyň mümkinçilikleri giňden peýdalanylyp, Türkmenistanyň Bilim ministrligi tarapyndan taýýarlanan dalasgar.bilim.tm web saýtynda ýurdumyzyň ýokary okuw mekdeplerine resminamalaryny tabşyran dalaşgärleriň san maglumaty yzygiderli mälim edildi. Onuň netijelerinden görnüşi ýaly, täze açylan Halkara senagatçylar we telekeçiler uniwersitetine hem dalaşgärleriň sanynyň köp bolandygy aýratyn bellenmäge mynasyp.

Türkmenistanyň ýokary we orta hünär okuw mekdeplerine okuwa kabul etmek, meýilnama laýyklykda, 2025-nji ýylyň 14-nji iýuly — 25-nji awgusty aralygynda guralar. Biz bolsa geljekki bagt hemrasyny — söýgüli hünärini saýlaýan ýaşlara giriş synaglarynda uly üstünlikleri arzuw edýäris.