21-nji iýunda sanly wideoaragatnaşyk arkaly geçirilen Ministrler Kabinetiniň mejlisinde wise-premýer Ç.Purçekow elektrik energetikasy pudagynyň maddy-enjamlaýyn binýadyny mundan beýläk-de pugtalandyrmak hem-de ýurdumyzda halkalaýyn energiýa ulgamyny döretmek boýunça taslamany durmuşa geçirmek bilen bagly alnyp barylýan işler barada hasabat berdi.

Hasabatda elektrik energiýasynyň öndürilişiniň hem-de eksporta iberilişiniň mukdaryny artdyrmak, elektrik üpjünçiliginiň hilini ýokarlandyrmak, ilatyň ykdysady-durmuş şertlerini gowulandyrmak maksady bilen Ahal — Balkan we Balkan — Daşoguz ugurlarynda halkalaýyn ýokary woltly elektrik geçirijileriniň gurluşygynyň möhüm ähmiýete eýedigi bellenildi. Häzirki wagtda bu taslamanyň amala aşyrylmagy üçin degişli işler alnyp barylýar.

Ahal — Balkan we Balkan — Daşoguz welaýatlarynyň arasynda ýokary woltly elektrik geçirijisini çekmek baradaky taslamanyň çäklerinde täze halkalaýyn energiýa ulgamy dörediler. Milli Liderimiz onuň ugrunda beketleriň, paýlaýjy transformator bölümleriniň onlarçasynyň guruljakdygyny, elektrik geçirijileriň ýüzlerçe kilometriniň çekiljekdigini belledi.

Şeýlelikde, gerimi boýunça ägirt uly bu taslamanyň durmuşa geçirilmegi bilen ýurdumyzda hereket edýän elektrik üpjünçilik ulgamy doly täzeleniler. Döwlet Baştutanymyz munuň okgunly ösýän sebitleri elektrik energiýasy bilen bökdençsiz üpjün etmek meselesini oňyn çözmäge mümkinçilik berjekdigini belledi.