Halkymyzyň baý medeni mirasyny saklamak, dikeltmek, öwrenmek we artdyrmak, milli gymmatlyklarymyzy, däp-dessurlarymyzy, maşgala edebini giňden wagyz etmek arkaly sagdyn, ýokary ahlakly, bilimli, watansöýüji ýaş nesiller üçin maksatnamalaýyn işler yzygiderli amala aşyrylmalydyr. Bu barada hormatly Belent Serkerdebaşymyz 26-njy fewralda hökümet agzalary, ministrlikleriň, edaralaryň we jemgyýetçilik guramalarynyň ýolbaşçylarynyň gatnaşmagynda geçirilen döwlet ýaşlar syýasatyny durmuşa geçirmegiň möhüm meseleleri boýunça pikir alyşmak boýunça maslahatynda aýtdy.

Berkarar döwletiň bagtyýarlyk döwründe şöhratly ata-babalarymyzyň asyrlarboýy nesilden-nesle geçirip gelen Watan goragyna hemişe taýýar bolmak babatyndaky milli ýörelgesi ýaşlaryň arasynda mynasyp dowam etdirilýär. Hormatly Belent Serkerdebaşymyzyň «Ýaşlara Watan diýen düşünjäniň mukaddesdigini düşündirmeli, ony gözüň göreji ýaly goramagy we ýürekden söýmegi terbiýelemeli» diýip nygtaýşy ýaly, ýaş nesilleriň terbiýesine, döwür bilen sazlaşykly milli ruhda kemala gelmegine aýratyn ähmiýet berilýär. Olaryň ylym-bilimden ýüki ýetik, ukyp-başarnykly, hünärli nesiller – ýurduň geljekki eýeleri bolup ýetişmegine aýratyn üns berilýär. Hormatly Belent Serkerdebaşymyz harby bilimiň, harby gullukçylaryň hünär başarnyklarynyň kämilleşdirilmegi ugrunda taýsyz tagallalary amala aşyrýar. Diňe goranmak häsiýetli harby doktrinamyzy amala aşyrmakdaky möhüm işleriň ählisi pederleriň arzuwlan ýurduny berkarar etmeklige gönükdirilendir. Kämil harby bilimi, hünäri ele alan, syýasy taýdan sowatly, giň dünýägaraýyşly, ukyp-başarnykly ýurt goragçylary bolsa, berkarar Watanymyzyň ygtybarly goragynyň kepili bolup durýar.

Döwlet Baştutanymyzyň taýsyz tagallalary netijesinde ylym-bilim, ösen tehnologiýalar bilen düýpli gyzyklanýan ýaşlar ýüze çykarylyp, olaryň ukyp-başarnyklaryny açmak üçin ähli şertler döredilýär. Hormatly Belent Serkerdebaşymyz her bir çykyşynda ýaşlara sagdyn durmuş kadalaryny ündemek, belent ahlak gymmatlyklaryny wagyz etmek, olary watansöýüjilik ruhunda terbiýelemek, milli medeniýetimizi ösdürmek bilen bagly işleri güýçlendirmegiň zerurdygyny belleýär. Şol nukdaýnazardan ýaşlaryň Garaşsyz Watanymyza, merdana halkymyza we şöhratly taryhymyza buýsanjy, ylym-bilime höwesi has-da artýar.

Häzirki wagtda ýaşlarda watansöýüjiligi terbiýelemekde, okuw-terbiýeçilik işiniň pedagogik prosesinde türkmen milli däp-dessurlaryny ulanyp, watansöýüjiliginiň derejesini ýokarlandyrmaga gönükdirilen işler Türkmenistanyň Ýaragly Güýçlerinde hem giňden alnyp barylýar. Harby bölümlerde harby gullukçylar bilen watançylyk, harby borç ýaly mowzuklar boýunça wagyz-nesihat çäreleri yzygiderli geçirýärler.

Milli goşunymyzyň ähli harby bölümlerinde harby gullukçylaryň medeniýetli dynç almagy we öz-özüni kämilleşdirmegi üçin gerekli bolan şertler döredilýär. Türkmenistanyň Ýaragly Güýçlerinde ýöriteleşdirilen ylmy, sport, döredijilik bölümçeleri hem hereket edýär. Bu bölümçelerde esgerleriň öňünde söweşjeň taýýarlyk bilen bir hatarda ylmy işleri bilen meşgullanmaga, ýurdumyzda we daşary ýurtlarda geçirilýän iri sport bäsleşiklerine gatnaşmaga giň mümkinçilikler açylýar.

Şunlukda, milli goşunymyz çagyryş boýunça harby gullugy geçýän ýetginjekleriň öz tebigy zehinlerini açmaga we giňden peýdalanmaga ähli zerurlyklaryň döredilen ýeri bolup durýar.

 «Milli goşun».