Şu gün hormatly Prezidentimiz Serdar Berdimuhamedow bilen Koreýa Respublikasynyň Prezidenti Li Çže Mýonyň arasynda telefon arkaly söhbetdeşlik geçirildi.

Söhbetdeşler mähirli salamlaşyp, döwletara gatnaşyklaryň ileri tutulýan ugurlaryny ara alyp maslahatlaşmaga dörän mümkinçilige kanagatlanma bildirdiler. Döwlet Baştutanymyz Li Çže Mýony Koreýa Respublikasynyň Prezidenti wezipesine saýlanylmagy bilen gutlap, oňa jogapkärli döwlet işinde uly üstünlikleri arzuw etdi.

Prezident Li Çže Mýon gutlaglar we hoşniýetli arzuwlar üçin hoşallyk bildirip, Türkmenistan bilen köpugurly gatnaşyklaryň ösdürilmegine Koreýa Respublikasynda möhüm ähmiýet berilýändigini belledi. Şeýle hem ol koreý-türkmen gatnaşyklaryny pugtalandyrmakda türkmen halkynyň Milli Lideriniň uly goşandyny aýratyn nygtap, Gahryman Arkadagymyza mähirli salamyny we iň gowy arzuwlaryny ýetirmegi haýyş etdi.

Söhbetdeşligiň dowamynda hormatly Prezidentimiz Türkmenistan bilen Koreýa Respublikasynyň arasyndaky söwda-ykdysady hyzmatdaşlygy aýratyn nygtady. Bellenilişi ýaly, köp ýyllaryň dowamynda «Hyundai», «Daewoo» we «LG» ýaly öňdebaryjy koreý kompaniýalary bilen özara hyzmatdaşlygyň oňyn tejribesi toplanyldy. Bu kompaniýalaryň gatnaşmagynda Türkmenistanda dürli taslamalar, hususan-da, Balkan welaýatynda bahasy 3 milliard 400 million amerikan dollaryndan gowrak bolan we ýylda 386 müň tonna polietilen hem-de 81 müň tonna polipropilen öndürýän gazhimiýa toplumynyň, «Galkynyş» gaz känini özleşdirmegiň çäklerinde bahasy ABŞ-nyň 1 milliard 484 million dollaryndan gowrak bolan hem-de ýylda 10 milliard kub metr harytlyk gazy kükürtden arassalaýan zawodyň taslamalary durmuşa geçirildi. Şeýle hem Türkmenabatdaky S.A.Nyýazow adyndaky himiýa zawodynda bahasy ABŞ-nyň 682 million dollaryna deň bolan we ýylda 350 müň tonna superfosfat hem-de 100 müň tonna ammoniý sulfaty dökünlerini öndürýän toplumyň taslamasyny görkezmek bolar.

Prezident Li Çže Mýon koreý kompaniýalaryna türkmen bazarynda netijeli işlemäge döredilýän amatly şertler üçin Türkmenistanyň Prezidentine hoşallyk bildirdi.

Söhbetdeşler medeni-ynsanperwer ulgamda hem hyzmatdaşlygy ösdürmek üçin ägirt uly mümkinçiligiň bardygyny nygtadylar.

Döwlet Baştutanymyz Türkmenistanyň başlangyjy boýunça BMG-niň Baş Assambleýasy tarapyndan 2025-nji ýylyň «Halkara parahatçylyk we ynanyşmak ýyly» diýlip yglan edilendigini we 12-nji dekabrda Aşgabatda halkara forumyň geçiriljekdigini aýtdy. Döwlet Baştutany bu taryhy senäniň ýurduň hemişelik Bitaraplygynyň 30 ýyllygyna gabat gelýändigini belläp, Prezident Li Çže Mýony bu foruma gatnaşmaga çagyrdy.

Koreýa Respublikasynyň Prezidenti çakylyk üçin hoşallyk bildirip, Türkmenistanyň oňyn Bitaraplyga esaslanýan parahatçylyk döredijilikli daşary syýasatynyň dünýä bileleşiginiň giň goldawyna eýe bolýandygyny belledi.