Hormatly Prezidentimiz Serdar Berdimuhamedow Ahal welaýatynyň Kaka etrabynyň Gowşut geňeşliginde täze, döwrebap Bagtly zamana obasynyň açylyş dabarasyna gatnaşyjylary tüýs ýürekden gutlady.

Döwlet Baştutanymyz öz Gutlagynda Berkarar döwletiň täze eýýamynyň Galkynyşy döwründe Ahal welaýatynyň Kaka etrabynyň Gowşut geňeşliginiň Bagtly zamana obasynda 400 sany döwrebap ýaşaýyş jaýynyň, 640 orunlyk orta mekdebiň, 320 orunlyk çagalar bagynyň, söwda merkeziniň, geňeşligiň edara binasynyň gurlup, ähli döwrebap şertler bilen üpjün edilendigini belleýär.

Nygtalyşy ýaly, Bagtly zamana obasy geňeşligiň täze taryhyna altyn harplar bilen ýazylyp, oba ýaşaýjylarynyň medeni-durmuş derejesiniň we hal-ýagdaýynyň ýokarlanmagyna ýardam eder. Obanyň gurluşygynyň giň gerimli özgertmeler maksatnamalarynyň üstünlikli durmuşa geçirilmegine uly goşant goşýan türkmen gurluşykçylary tarapyndan ýerine ýetirilmegi aýratyn guwandyryjydyr.