Türkmenistanyň Goranmak ministrliginiň Harby-deňiz institutynyň orta hünär bilimine 2026–2027-nji okuw ýylynda okuwa kabul etmegiň

TERTIBI

1.   Türkmenistanyň Goranmak ministrliginiň Harby-deňiz institutynyň orta hünär bilimine Watana, Türkmenistanyň Prezidentine, Türkmenistanyň Ýaragly Güýçleriniň Belent Serkerdebaşysyna wepaly, sagdyn pikirli, arassa ahlak sypatly, beden we ruhy taýdan sagdyn, degişli bilim maksatnamasyny özleşdirmäge ukyply we taýýarlykly, harby we hukuk goraýjy edaralaryň işgärlerine bildirilýän aýratyn talaplara laýyk gelýän we Harby-deňiz institutynyň orta hünär bilimini almaga isleg bildiren, umumy orta bilimli, aşakda görkezilen ýaş derejelerine gabat gelýän Türkmenistanyň raýatlary, giriş synaglarynyň netijeleri boýunça bäsleşik esasynda okuwa kabul edilýär:

1)  orta bilimli, çagyryş boýunça harby gullugy geçen, harby gulluga meýletin girmäge isleg bildiren, ýaşy 24-den geçmedik erkek raýatlar;

2)  Türkmenistanyň Goranmak ministrliginiň Ýöriteleşdirilen harby mekdeplerini tamamlap, çagyryş boýunça harby gullugy geçen ýa-da çagyryş boýunça harby gullugy 12 aýdan köp gulluk eden, ýaşy 25-den geçmedik erkek raýatlar;

3)  harby gulluk ýa-da harby ýygnanyşyklar döwründe harby gulluk borçlaryny ýerine ýetirmek bilen baglanyşykly aradan çykanyň ogullary (süýtdeş doganlary),

4)  harby gullugy ýa-da harby ýygnanyşyklary geçen döwründe özleriniň harby gullugy geçmekleri bilen baglanyşykly maýyp bolanyň ýa-da ýaralanyp, synasyna şikes ýetip, seňse bolup kesele ýolukmagy netijesinde harby gullukdan boşan (harby ýygnanyşyklar tamamlanan) gününden soň bir ýylyň dowamynda aradan çykanyň ogullary (süýtdeş doganlary).

Dalaşgärleriň ýaş derejeleri 2026-njy ýylyň 1-nji sentýabryna çenli hasaplanylýar.

Harby-deňiz institutynyň orta hünär biliminiň okuw möhleti 2 okuw ýyly.

2.   Harby-deňiz institutynyň orta hünär biliminde okamaga isleg bildiren, şu Tertibiň 1-nji böleginde görkezilen talaplara laýyk gelýän dalaşgärler ýaşaýan ýerleri boýunça etraplaryň, etrap hukukly şäherleriň harby wekilleriniň adyna 2026-njy ýylyň ýaz möwsüminde çagyryş boýunça harby gullugyny tamamlaýan ýaşy 24-den geçmedik we Türkmenistanyň Goranmak ministrliginiň Ýöriteleşdirilen harby mekdeplerini tamamlap, çagyryş boýunça harby gullugy geçen ýa-da çagyryş boýunça harby gullugy 12 aýdan köp gulluk eden, ýaşy       25-den geçmedik çagyryş boýunça harby gullukçylar harby bölümiň serkerdesiniň adyna 2026-njy ýylyň 1-nji maýyna çenli arza ýazmaly.

3.   Harby-deňiz institutynyň orta hünär bilimini almaga isleg bildiren dalaşgärler bilen Türkmenistanyň orta mekdepleriniň okuw maksatnamalarynyň esasynda matematika, Türkmenistanyň taryhy dersleri hem-de beden taýýarlygy (kadalary ýerine ýetirmek) boýunça giriş synaglary kabul edilýär. Dersler boýunça giriş synaglary türkmen dilinde kabul edilýär.

4.   Giriş synagyny zstznlikli tabşyryp, Harby-deňiz institutynyň orta hünär bilimine okuwa kabul edilenler umumy ýaşaýyş jaýy (ýatakhana), harby eginbaşlary we okuw serişdeleri bilen üpjün edilýärler. Olara günde üç wagtyna nahar berilýär hem-de Türkmenistanyň kanunçylygynda bellenen tertipde we möçberde talyp haklary tölenýär.

Habarlaşma üçin telefon belgilerimiz: 8-00-243 7-97-34,  8-00-12 40-23-28.

Kabul ediş topary.