Ýurdumyzyň ekerançylyk meýdanlarynda wajyp oba hojalyk möwsümi hasaplanylýan köpçülikleýin gowaça ekmek işine girişildi. 

Hormatly Prezidentimiz Gurbanguly Berdimuhamedowyň Ministrler Kabinetiniň 15-nji martda geçirilen mejlisinde kesgitlän möhletlerine laýyklykda, Ahal, Balkan, Lebap we Mary welaýatlarynyň pagtaçylary 23-nji martda gowaça ekişine girişdiler. Daşoguz welaýatynyň daýhanlary bu möwsüme biraz gijiräk — 27-nji martda başlarlar.

Asylly däbe görä, ekiş möwsümine il içinde sylaglanylýan hormatly ýaşulular ak pata berdiler. Olar Beýik Biribardan Watanymyza, halkymyza, milli Liderimize abadançylyk, gülläp ösüş dileg edip, «Bissimilla» bilen topraga tohum taşladylar. Soňra olar kuwwatly tehnikalara erk edýän mehanizatorlara orun berdiler.