Türkmenistanyň Ministrler Kabinetiniň başlygynyň orunbasary Serdar Berdimuhamedow iş sapary bilen Aşgabada gelen Özbegistanyň premýer-ministriniň orunbasary, ýurduň Maýa goýumlary we Daşary söwda ministri bilen gepleşik geçirdi.

Taraplar ulag, ýangyç we energetika, şeýle hem iki tarapa-da bähbitli beýleki ugurlarda hyzmatdaşlygy güýçlendirmegiň mümkinçiliklerine garadylar hem-de Merkezi Aziýa döwlet baştutanlarynyň ýakyn wagtda geçiriljek geňeş duşuşygynyň çäginde komissiýanyň şärikli başlyklarynyň maslahatyny guramagyň tarapdarydygyny aýtdylar.

Myhman Türkmenistanyň Ministrler Kabinetiniň Başlygynyň orunbasary we Daşary işler ministri bilen hem duşuşdy.

Söhbetdeşligiň barşynda taraplar Merkezi Aziýa döwletleriniň baştutanlarynyň, çäginde ikitaraplaýyn gepleşikler meýilleşdirilýän, ýakyn wagtda geçiriljek maslahat duşuşygynyň möhümdigini nygtadylar. Taraplar, şeýle hem, iki ýurduň arasynda ulag we tranzit aragatnaşygyny işjeňleşdirmek, nebit-himiýa senagatyny-da goşmak bilen, energetika-senagat hyzmatdaşlygyny güýçlendirmek meselelerini ara alyp maslahatlaşdylar.