«Türkmenistan – rowaçlygyň Watany» ýylynyň ilkinji aýynda Mary welaýatynyň Baýramaly şäherinde polietilen turba we polipropilen turba önümlerini öndürýän önümçilik kärhanasy, Mary etrabynda bolsa ýylda 500 tonna gök we bakja önümlerini ösdürip ýetişdirýän döwrebap ýyladyşhana bir wagtda dabaraly ýagdaýda açylyp ulanylmaga berildi.

Baýramaly şäherinde gurlan «Eşretli kenar» kärhanasy halk hojalygynda, durmuşda, söwda nokatlarynda gündelik ulanylýan polietilen torba we polipropilen turba önümlerini öndürmäge niýetlenendir. Bu täze önümçilik kärhanasyny «Älemabat HJ-niň» gurluşykçylary ýokary hil derejesinde bina etdiler. Kärhanada polietilen torbalaryň, ýyladyşhanalar üçin polietilen örtükleriniň, gurluşyk pudagynyň izolýasiýasynda we dokma pudagynyň önümlerini gaplamakda giňden ulanylýan polietilen önümleriniň dürli görnüşleriniň ýokary hilli 20 millimetrden başlap, 60 millimetre çenli bolan göwrümdäki suw geçiriji polipropilen turbalarynyň önümçiligi amala aşyrylýar. Polietilen we polipropilen önümlerini öndürmek üçin gerek bolan çig mal Balkan welaýatyndaky Gyýanly Polimer zawodyndan we Türkmenbaşydaky nebiti gaýtadan işleýän zawodlar toplumyndan getirilýär.