Şu ýylyň 18 — 21-nji iýunynda Russiýa Rederasiýasynyň Sankt-Peterburg şäherinde Peterburg halkara ykdysady forumy üstünlikli geçirildi. Dünýäniň 140-dan gowrak ýurdundan 20 müňden agdyk wekili Newanyň boýundaky şähere jemlän bu iri çäre häzirki zaman dünýäsindäki ykdysady ýagdaýlary, söwda, durmuş, tehnologiýa ýaly ugurlarda hyzmatdaşlygyň geljekki meýillerini ara alyp maslahatlaşmak üçin netijeli meýdança öwrüldi. Hormatly Prezidentimiziň tabşyrygyna laýyklykda, Ministrler Kabinetiniň Başlygynyň orunbasary N.Atagulyýewiň ýolbaşçylygyndaky türkmen wekiliýeti hem dostlukly ýurtda iş saparynda bolup, foruma gatnaşdy.

Türkmen wekiliýeti Russiýanyň demirgazyk paýtagtynda 1997-nji ýyldan bäri her ýyl geçirilip gelinýän Peterburg halkara ykdysady forumy  diňe bir forumyň işine gatnaşman, onuň çäklerinde netijeli duşuşyklary-da geçirdiler.

Ykdysady hyzmatdaşlyk boýunça hökümetara türkmen-rus toparynyň bilelikdäki başlyklarynyň — Türkmenistanyň Ministrler Kabinetiniň Başlygynyň orunbasary N.Atagulyýew bilen Russiýa Federasiýasynyň Hökümetiniň Başlygynyň orunbasary M.Husnulliniň arasynda bolan duşuşykda taraplar söwda, senagat, energetika, oba hojalygy, bilim, medeniýet ulgamlaryndaky hyzmatdaşlygyň wajyp meselelerini ara alyp maslahatlaşdylar we ikitaraplaýyn gatnaşyklary mundan beýläk-de ösdürmegiň meýilnamalaryny kesgitlediler.

Peterburg forumynyň çäginde RF-niň Tatarystan Respublikasynyň Baştutany Rustam Minnihanow bilen geçirilen duşuşyk hem netijeli häsiýete eýe boldy. Duşuşykda nebitgaz, maşyn we gämi gurluşygy, himiýa senagaty ýaly pudaklarda özara hereketleri has-da işjeňleşdirmek babatda anyk teklipler beýan edildi.