Türkmenistanyň Bilim ministrliginiň goldamagynda Döwletmämmet Azady adyndaky Türkmen milli dünýä dilleri institutynyň Aşgabadyň 140 ýyllygyna bagyşlanyp internet arkaly geçiren iňlis dili boýunça olimpiadasynyň netijesinde  2 ýeňiji we   baýrak eýeleriniň 5-si belli boldy.  

Olimpiadanyň şertine görä, oňa her ýokary okuw jaýyndan bäş talyp gatnaşdy. Şeýlelikde,  ýurdumyzyň  ýokary okuw jaýlarynyň 18-sinden talyplaryň 90-sy güýç synanyşdy.

Olimpiadanyň ýumuşlary oňa gatnaşanlaryň okamak endiklerini, gepleşik we ýazuw dilini, şeýle hem iňlis diliniň grammatikasyny bilşini barlamaga mümkinçilik berdi. Barlaglaryň ýumuşlary talyplaryň üç ugur: ynsanperwer, tehniki we takyk ylymlar boýunça ýöriteleşýän ugurlaryna  görä taýynlanypdy. Synag tabşyryklarynda türkmen halkynyň  taryhyna hem-de häzirki döwürde gazanýan üstünliklerine  degişli  sowallaryň jogaplary teswirlendi.