Germaniýa Federatiw Respublikasynda Türkmenistanyň sungat ussatlarynyň çykyşlary uly üstünlik bilen geçdi. Olar Baýroýt şäherinde geçirilen ýaş artistleriň 69-njy halkara festiwalyna hem gatnaşdylar.

Biziň saz sungatymyzyň ussatlarynyň maksatnamasyna kamera orkestriniň ýerine ýetirmeginde halk sazlary we nusgawy eserler girizildi. Hormatly Prezidentimiz Gurbanguly Berdimuhamedowyň parasatly ýolbaşçylygynda ösüşiň täze belentliklerine tarap ynamly barýan Watanymyzyň üstünliklerini görkezýän fotosergi guraldy.

Festiwalyň resmi açylyş dabarasy nusgawy saz eserlerini döredijiler — R.Wagneriň we F.Listiň şäheri — Baýroýtda geçirildi.

Türkmenistanly artistleriň çykyşy uly gyzyklanma hem-de şowhunly el çarpyşmalar bilen garşylandy. Türkmen halk saz gurallarynda ýerine ýetirilen folklor kompozisiýasy, Nury Halmämmedowyň, Pýotr Çaýkowskiniň, Astor Pýassollanyň hem-de bütin dünýä meşhur beýleki kompozitorlaryň nusgawy eserleri ýaňlandy. Olary kamera orkestri ýerine ýetirdi.

Döredijilik iş saparynyň çäklerinde Türkmenistanyň artistleri 10-a golaý konsert bilen çykyş etdiler. Olaryň her biri halklary we medeniýetleri ýakynlaşdyrmagyň ýolunda ähmiýetli täze ädime öwrüldi.