Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow ýurda sapar bilen gelen «Kawasaki Heavy Industries, Ltd.» ýapon kompaniýasynyň ýerine ýetiriji direktory Kendzi Sanada bilen duşuşdy.

«Watan» habarlar gepleşiginde habar berlişi ýaly, duşuşykda «Kawasaki» kompaniýasynyň ýerine ýetiriji direktory duşuşmaga döredilen mümkinçilik üçin hoşallyk bildirip, türkmen halkynyň Milli Liderini Arkadag şäheriniň açylmagynyň 2 ýyllygy bilen gutlady. Ol pursatdan peýdalanyp, Ýaponiýanyň Imperatorynyň we Premýer-ministriniň Gahryman Arkadagymyza iberen mähirli salamyny, ähli türkmen halkyna iň gowy arzuwlaryny ýetirdi.

Türkmenistanyň Halk Maslahatynyň Başlygy hoşniýetli sözler üçin minnetdarlyk bildirip, dostlukly ýurduň ýolbaşçylaryna iň gowy arzuwlaryny beýan etdi.

Duşuşygyň barşynda Türkmenistanyň ozaldan gelýän ygtybarly hyzmatdaş hasaplanylýan Ýaponiýa bilen netijeli gatnaşyklary pugtalandyrmaga uly ähmiýet berýändigi aýdyldy.

Söhbetdeşlikde «Kawasaki» kompaniýasy bilen ýola goýlan köpýyllyk hyzmatdaşlygyň netijeli häsiýeti bellenildi.

Türkmenistanyň Halk Maslahatynyň Başlygy we «Kawasaki» kompaniýasynyň ýerine ýetiriji direktory duşuşykda geljekki täze taslamalary ara alyp maslahatlaşdylar.

Gahryman Arkadagymyz ikitaraplaýyn hyzmatdaşlygy ösdürmek üçin uly mümkinçilikleriň bardygyny belläp, Türkmenistanyň «Kawasaki» kompaniýasynyň döwrebap, täze taslamalar babatda tekliplerine seretmäge taýýardygyny aýtdy.

Işewür Türkmenistanda netijeli iş alyp barmaga döredilýän mümkinçiliklerdir şertler üçin hoşallyk bildirip, ýolbaşçylyk edýän kompaniýasynyň hyzmatdaşlyk borçnamalaryna mundan beýläk-de ygrarly boljakdygyny belledi.