Düýn – 27-nji ýanwarda Arkadag şäheriniň Berdimuhamet Annaýew adyndaky mugallymçylyk orta hünär okuw mekdebinde Watan goragçylarynyň güni mynasybetli hormatly Prezidentimiziň garry atasynyň ýadygärligine gül goýmak hem-de döwrebap şäherde harby we hukuk goraýjy edaralaryň işgärlerine ähli amatlyklary bolan öýleriň açarlaryny gowşurmak dabaralary geçirildi.

Dabaranyň başynda Arkadag şäheriniň Aman Gulmämmedow adyndaky döwlet drama teatrynyň artistleri hem-de Türkmenistanyň Ýaragly Güýçleriniň «Göreldeli» harby orkestriniň aýdymçy-sazandalary çykyş etdiler. Olaryň çykyşlary parahatçylygyň, ynanyşmagyň, abadan durmuşyň senasy bolup ýaňlandy.

Dabara gatnaşyjylar täze şäheriň ýaşaýyş jaýlaryndan berlen täze öýlerde döredilen amatly şertler bilen hem tanyşdylar. «Akylly» öý tehnologiýalary peýdalanylyp bina edilen jaýlaryň gurluşygynda we enjamlaşdyrylyşynda, bezeg işlerinde iň häzirki zaman çözgütlerinden peýdalanylypdyr. Öýleriň aşhanasy, eýwanlary, olaryň gurluş aýratynlyklary amatlylygyň ýokary talaplaryna doly laýyk gelýär. Jaýyň ýanaşyk ýerleri göwnejaý abadanlaşdyrylyp, çagalar üçin oýun meýdançalary, dürli dabaralary geçirmek üçin ýerler göz öňünde tutulypdyr.