24-nji aprelda Hojambaz etrabynyň dolandyryş merkezinde etrap aragatnaşyk bölüminiň täze binasynyň açylyş dabarasy boldy. Bu desga Senagat we kommunikasiýa ministrliginiň buýurmasy boýunça ýerli gurluşykçylar tarapyndan bina edildi.

Etrabyň aragatnaşyk bölüminiň binasy milli Liderimiziň şähergurluşyk düzümine bildirilýän talaplary hasaba alnyp guruldy. Iň öňdebaryjy enjamlar we kompýuter tehnikasy bilen üpjün edilen täze binada «Altyn asyr» sanly aragatnaşyk gullugy, merkezi poçta, 1 müň 680 belgili awtomatlaşdyrylan telefon bekedi, ilata hyzmat etmek boýunça giň otaglar, iş otaglary, durmuş maksatly jaýlar ýerleşýär.

Binanyň ýanaşyk ýerleri abadanlaşdyryldy we agaç nahallary ekildi. Dabaranyň dowamynda iň gowy gurluşykçylara gymmat bahaly sowgatlar gowşuryldy.