Türkmen döwlet bedenterbiýe we sport institutynyň sport toplumynda basketbol boýunça Türkmenistanyň çempionatynyň duşuşyklary örän gyzgalaňly hem-de çekeleşikli häsiýete eýe boldy. 10 — 14-nji oktýabr aralygynda geçirilen milli ýaryşa 8 topar gatnaşdy.

Sportuň Ýer ýüzündäki meşhurlygy barha artýan görnüşi boýunça geçirilen milli çempionatda ýerli ýokary okuw mekdebiniň «Talyp sporty», Türkmenistanyň Goranmak ministrliginiň Merkezi goşun sport kluby, paýtagtymyzyň «Aşgabat», Türkmen döwlet binagärlik-gurluşyk institutynyň «Binagär», Türkmen döwlet maliýe institutynyň «Maliýeçi» toparlary, ýurdumyzyň 18 ýaşa çenli ýetginjekler hem-de Lebap, Daşoguz welaýatlarynyň ýygyndy toparlary ýaryşdylar. Ýaryşyň tertibine laýyklykda 8 topar öz arasynda iki toparça bölündi.

Her biri ýiti hüjümlere beslenen toparçalaýyn duşuşyklaryň netijesinde «Talyp sporty», «Aşgabat», «Binagär» toparlary we Merkezi goşun sport kluby baýrakly orunlar üçin göreşmäge hukuk gazandylar. Deslapky duşuşyklaryň netijesinde finala «Talyp sporty» we «Aşgabat» toparlary çykdy. Örän dartgynly geçen duşuşykda talyp türgenler paýtagtyň adybir toparynyň wekillerini ýeňmegi başardylar. Şeýlelikde, «Talyp sporty» topary ýurdumyzyň çempiony bolmagy başardy. Üçünji orun ugrundaky duşuşykda bolsa Türkmenistanyň Goranmak ministrliginiň topary binagär talyplaryň toparyndan üstün çykdy.

Ýaryşa gatnaşyjylaryň içinde milli ýygyndymyzyň agzalary kän. Olar häzirki wagtda dürli toparlara wekilçilik edýärler. Milli çempionat halkara ýaryşlarda ýurdumyzyň sport abraýyny goraýan basketbolçylar üçin hem taýýarlygyň täze mekdebine öwrüldi. Şeýle hem Türkmenistanyň basketbol boýunça milli ýygyndysynyň tälimçiler düzümi toparlarda täze zehinleri ýüze çykaryp, olary milli ýygyndymyza çagyrdylar.