Ýurdumyzda Aşgabat atçylyk sport toplumynyň açyk manežinde Türkmen bedewiniň milli baýramy mynasybetli guralýan dabaralaryň çäklerinde bedewleriň päsgelçiliklerden böküp geçmek boýunça bäsleşigi geçirildi. Ajaýyp baýramyň hormatyna guralýan bu bäsleşik ýurdumyzda Gahryman Arkadagymyzyň we Arkadagly Gahryman Serdarymyzyň tagallalary bilen atçylyk sportunyň ösüşiň täze belentliklerine çykýandygyny alamatlandyrýan waka öwrüldi.

«Garaşsyz, baky Bitarap Türkmenistan – bedew batly at-myradyň mekany» ýylynda guralýan dabaralar we geçirilýän bäsleşikler ýurdumyzda ajaýyp seneleriň ähmiýetini has-da artdyrýar. Bu bolsa geçirilýän çäreleriň ýokary guramaçylyk derejesiniň üpjün edilmegini şertlendirýär.

Aşgabat atçylyk sport toplumynyň açyk manežinde geçirilen bäsleşige saýlama bedewleriň jemi 10-sy gatnaşdyryldy. Ýaryşyň şertine görä bäsleşik 3 tapgyrdan ybarat boldy. Şol tapgyrlar bedewleriň bellenilen degişli beýikliklerdäki birnäçe pasgelçiliklerden böküp geçmegini öz içine aldy.

Bäsleşige gatnaşýan bedewler päsgelçiliklerden bellenilen kadalara laýyklykda geçmegi başaryp, özleriniň görkezýän netijelerini artdyrýarlar. Bu bolsa ýeňşe bolan ynamyň pugtalanmagynda aýratyn ähmiýetli hasaplanylýar. Şeýlelikde, ýurdumyzda geçirilýän toý baýramlaryň baş bezegine öwrülýän at çapyşyklary we päsgelçiliklerden bökmek ýaryşlary häzirki zaman durmuşyna barha işjeň ornaşýar. Bu bolsa ahalteke bedewleriniň dünýä ýüzündäki şöhratynyň has-da belende galmagyny üpjün edýär.