4-nji fewralda hormatly Prezidentimiz Gurbanguly Berdimuhamedow Aşgabat şäheriniň häkimi Ş.Durdylyýewiň haýyşy boýunça paýtagtymyzyň düzümini mundan beýläk-de ösdürmegiň taslamalary, dürli maksatly desgalaryň gurluşygyndaky işleriň ýagdaýy bilen tanyşdy.

Milli Liderimiz ýurdumyzyň baş şäheriniň günorta-günbatar künjegine baryp, täze guruljak desgalaryň taslamalary bilen tanyşdy.

Aşgabat şäheriniň häkimi döwlet Baştutanymyz Gurbanguly Berdimuhamedowa taýýarlanylan taslamalar, şolaryň özboluşly aýratynlyklary, hususan-da, gurulmagy meýilleşdirilýän desgalaryň daşky we içki bezegleri, ýerleşjek ýerleri barada gürrüň berýän çyzgylar hakynda hasabat berdi.

Soňra döwlet Baştutanymyz dikuçardan Aşgabat şäheriniň bu künjegini we Gökdepe etrabynyň çäginde gurulýan Ahal welaýatynyň täze, döwrebap edara ediş merkezinde ýaýbaňlandyrylan giň möçberli işleri synlady.

Iş saparynyň barşynda, döwlet Baştutanymyz Halkara ahalteke atçylyk sport toplumyna baryp gördi hem-de Türkmenistanyň Prezidentiniň Ahalteke atçylyk toplumynda idedilýän bedewler bilen didarlaşdy.