Türkmenistanyň Garaşsyzlygynyň 33 ýyllyk baýramy hormatly Prezidentimiziň baştutanlygynda döretmek, öňegidişlik we gülläp ösüş ýoly bilen ynamly öňe barýan Watanymyzyň taryhyna möhüm sene bolup ýazyldy.

Garaşsyzlyk ýyllary içinde merdana harby gullukçylarymyz Watanymyzyň asudalygyny we özygtyýarlylygyny pugtalandyrmak, goranmak ukybyny berkitmek, çäk bitewüligini goramak işlerini mynasyp derejede alyp barýarlar. Şuňa laýyklykda, Garaşsyzlyk baýramy mynasybetli hormatly Prezidentimiz, Türkmenistanyň Ýaragly Güýçleriniň Belent Serkerdebaşysy Serdar Berdimuhamedowyň gol çeken Permanyna laýyklykda, gulluk borçlaryny göreldeli ýerine ýetiren, söweşjeň taýýarlykda ýokary görkezijileri gazanan ýurdumyzyň harby we hukuk goraýjy edaralarynyň harby gullukçylary hem-de işgärleri Türkmenistanyň medallary bilen sylaglanyldy. Olara harby we ýörite atlaryň dakylyp, hünär derejeleriniň berilmegi bolsa ata Watany goraýan gerçeklerimiziň sarpasyny has-da dabaralandyrdy.