Milli ykdysadyýetimiziň ähli ulgamlaryna we pudaklaryna sanly tehnologiýalaryň ornaşdyrylmagy Türkmenistanyň Prezidentiniň ýurdumyzy 2019-2025-nji ýyllarda durmuş-ykdysady taýdan ösdürmegiň Maksatnamasynyň baş ugry hem-de ösen ýurtlaryň derejesine çykmagyň, bilimlere we innowasiýalara daýanýan ykdysady ösüşiň durnukly depginlerini üpjün etmegiň möhüm şerti bolup durýar.

Hormatly Prezidentimiz Gurbanguly Berdimuhamedow orta möhletli geljekde ykdysadyýetiň ähli ulgamlaryna maglumat tehnologiýalarynyň işjeň ornaşdyrylmagyny, häzirki zaman we howpsuz IT-düzümleriniň döredilmegini strategik taýdan ileri tutulýan ugurlaryň hatarynda kesgitlendi, munuň özi barha ýokary depginlere eýe bolýan çalt sanlylaşdyrmak işlerini degişli tehnologiýalar bilen üpjün eder.

Maliýe we ykdysadyýet ministrligi tarapyndan sanlylaşdyrmak boýunça uly işler alnyp barylýar, bu ministrlik maliýe, salgyt-býujet, maýa goýumlary, nyrh syýasaty, ätiýaçlandyryş, auditorlyk işi, buhgalter hasabaty, maliýe hasabatlylygy, maliýe howpsuzlygy ulgamynda syýasaty hem-de Durnukly ösüş maksatlaryny ornaşdyrmak boýunça ýurdumyzyň ähli ministrlikleriniň we pudaklaýyn dolandyryş edaralarynyň işlerini utgaşdyrmagy amala aşyrýar.

Ýurdumyzda hormatly Prezidentimiz Gurbanguly Berdimuhamedowyň tabşyrmagy boýunça işleri sanlylaşdyrmagyň hukuk hem-de kadalaşdyryş binýady döredildi, şol maglumatlary we elektron resminamalary alyşmak, umumy bir sydyrgynlaşdyrmak işleri hem öz içine alýan häzirki talaplary hem-de ylmy-tehniki işläp taýýarlamalar nazarda tutulyp, yzygiderli kämilleşdirilýär. Şu esasda sebit gulluklarynda we degişli düzümlerde hem sanly tehnologiýalary ornaşdyrmak boýunça işler alnyp barylýar.