Paýtagtymyz Aşgabatda 23 – 28-nji noýabr aralygynda geçiriljek Kuraş boýunça XIV dünýä çempionatynyň başlanmagyna az wagt galdy.

Aşgabadyň Halkara howa menziliniň binasyndaky, paýtagtyň merkezi köçelerindäki we LED ekranlaryndaky «Kuraş boýunça dünýä çempionatyna hoş geldiňiz!» diýen ýazgylar myhmanlary garşy alýar. Türkmenistanyň Kuraş federasiýasy tarapyndan berlen täze maglumatlara görä, bu iri sport ýaryşyna türgenler, tälimçiler, eminler we beýleki resmi adamlar – jemi 53 ýurtdan 490-dan gowrak adam geler. Bu ýagdaý ýaryş heniz başlanmazdan, oňa gatnaşmaga isleg bildirenleriň sany boýunça özboluşly rekord goýandygyny aňladýar. Ýeri gelende bellesek, geçen ýyl Hindistanyň Puna şäherinde geçirilen dünýä çempionatyna şundan 126 adam az gatnaşdy. Onda ildeşlerimiz bir kümüş we iki bürünç medal gazandy.

Daşary ýurtly myhmanlar Türkmenistanyň Bedenterbiýe we sport baradaky döwlet komitetiniň, Aşgabat şäheriniň bedenterbiýe we sport baradaky Baş müdirliginiň we Türkmenistanyň Kuraş federasiýasynyň ýolbaşçylary we işgärleri bilen duşuşyp, paýtagtymyzyň Olimpiýa şäherçesiniň çäginde ýerleşýän Başa-baş söweş sungaty sport toplumynyň işi bilen tanyşdylar. Häzirki wagtda açylyş dabarasy geçiriljek Aşgabadyň Olimpiýa şäherçesi has-da dabaraly.

Sport ýaryşlary jemi 15 (7-si erkekleriň, 8-si zenanlaryň arasynda) agram derejesinde guralyp, ýeňijiler Türkmenistanyň ýokary derejeli eminler topary tarapyndan kesgitleniler. Nesip bolsa, ýurdumyzyň ýygyndy toparynyň düzüminde 15 türgen (7-si erkek, 8-si zenan) çykyş edip, Watanymyzyň halkara sport abraýyny gorar.

Gahryman Arkadagymyzyň, hormatly Prezidentimiziň baştutanlygynda amala aşyrylýan döwlet syýasatynyň ileri tutulýan ugurlaryndan biri bolan bedenterbiýäni we sporty ösdürmek boýunça beýik maksatly tagallalar netijesinde ýurdumyzda geçirilýän Kuraş boýunça XIV dünýä çempionaty uly ýeňişlere hem-de şowlulyklara beslensin!

Üstünlik hemraňyz bolsun, türkmen türgenleri!