Ýurdumyzda Türkmen bedewiniň milli baýramy giňden bellenildi, şanly baýramyň hormatyna 26-njy aprelde Halkara ahalteke atçylyk sport toplumynda hormatly Prezidentimiz Gurbanguly Berdimuhamedowyň gatnaşmagynda esasy wakalar ýaýbaňlandy. Bu ýerde dürli aralyklarda geçirilen at çapyşyklarynyň jemi ýedisi bolup, şolaryň her birine bedewleriň 12-si gatnaşyp, iň gowy sport häsiýetlerini görkezdiler.

Türkmenistanda gadymy däpleri bolan at çapyşyklary häzir hem ozalkysy ýaly uly meşhurlykdan peýdalanýar. Münberde oturan janköýerleriň, tele we foto kameralarynyň dykgat bilen syn eden ýaryşlary iki sagatdan hem gowrak dowam etdi.

Dürli aralyklarda geçirilen at çapyşyklaryň ýeňijilerine 20 müň amerikan dollary möçberinde pul baýraklary gowşuryldy. Jemleýji baýramçylyk çapyşygynyň ýeňijisine Türkmenistanyň Prezidentiniň baş baýragy – 30 müň amerikan dollary gowşuryldy.

Soňra baýramçylyk bäsleşikleriniň – at çapyşyklarynyň, uzak aralyga hem-de päsgelçilikden bökmek (konkur) görnüşi boýunça ýaryşlaryň ýeňijilerine döwlet Baştutanymyz Gurbanguly Berdimuhamedowyň adyndan gymmat bahaly sowgatlar gowşuryldy.