28-nji dekabrda hormatly Prezidentimiz Gurbanguly Berdimuhamedow paýtagtymyzdaky Olimpiýa şäherjigine bardy. Şol ýerde öňümizdäki 2020-nji ýylda sport dünýäsinde iri halkara wakalarynyň üçüsi bolup geçer. Şolar Sambo boýunça dünýä çempionaty, futzal boýunça Aziýanyň çempionaty hem-de Dewisiň Kubogy ugrundaky tennis ýaryşynyň tapgyry (Aziýa zolagy/Okeaniýa, IV topar) bilen baglanyşyklydyr.

Döwlet Baştutanymyz şeýle giň gerimli çärelere taýýarlyk görmek işlerine hut özi gözegçilik edýär. Munuň özi köp babatda şolaryň uly üstünlige eýe bolmagyny üpjün edýär. 2017-nji ýylda Ýapyk binalarda we söweş sungaty boýunça V Aziýa oýunlarynyň, 2018-nji ýylda agyr atletika boýunça dünýä çempionatynyň üstünlikli geçirilmegi munuň aýdyň subutnamasydyr.

Olimpiýa şäherjiginde hormatly Prezidentimiz Gurbanguly Berdimuhamedowy wise-premýer P.Agamyradow, Aşgabat şäheriniň häkimi Ş.Durdulyýew hem-de sport we ýaşlar syýasaty ministri D.Gulgeldiýew garşyladylar.

Milli Liderimiz aýak üstünde ýolbaşçylar bilen söhbetdeşligiň barşynda işleriň ýagdaýy bilen gyzyklandy hem-de Olimpiýa şäherjiginde işiň dürli ugurlary barada anyk sowallary berdi. Döwlet Baştutanymyz türgenlerimiz üçin alynýan sport serişdelerine bildirilýän esasy talabyň hili we iň gowy tehniki häsiýetleri bilen baglanyşyklydygyny aýtdy.

Hormatly Prezidentimiz Gurbanguly Berdimuhamedow degişli ýolbaşçylara dünýä standartlarynyň ýokary talaplaryna kybap gelýän sport üpjünçilik ulgamyna eýe bolan, Türkmenistanyň iri halkara ýaryşlaryny geçirmekde toplan tejribesiniň netijeli ulanylmalydygyny tabşyrdy.