11-nji maýda hormatly Prezidentimiz Gurbanguly Berdimuhamedow Ministrler Kabinetiniň Başlygynyň orunbasary Ş.Durdylyýewiň haýyşy boýunça paýtagtymyza iş saparyny amala aşyrdy. Onuň dowamynda döwlet Baştutanymyz Aşgabady durmuş-ykdysady taýdan ösdürmek, şäher düzümlerini kämilleşdirmek, paýtagtymyzda alnyp barylýan gurluşyk işleriniň depginleri bilen baglanyşykly meseleler bilen tanyşdy.

Ministrler Kabinetiniň Başlygynyň orunbasary hormatly Prezidentimiz Gurbanguly Berdimuhamedowa paýtagtymyzy durmuş-ykdysady taýdan has-da ösdürmek boýunça işlenip taýýarlanylan taslamalar hem-de häzirki döwürde gurluşygy dowam edýän desgalar barada hasabat berdi we bu ugra degişli taslamalary, çyzgylary görkezdi.

Milli Liderimiz hasabaty diňläp hem-de görkezilen taslamalar bilen içgin tanşyp, olara birnäçe bellikleri aýtdy we degişli düzedişleri girizdi. Soňra döwlet Baştutanymyz Aşgabat şäheri boýunça iş saparyny dikuçarda dowam etdi. Milli Liderimiziň dikuçary şäheriň gündogar künjegine ugur aldy.

Soňra milli Liderimiz dikuçarda paýtagtymyzyň demirgazygynda alnyp barylýan gurluşyk işleri bilen tanyşdy. Döwlet Baştutanymyz häzirki döwürde ýurdumyzyň ähli künjeklerinde çagalar üçin bolşy ýaly, uly adamlar üçin hem zerur bolan dynç alyş şertleriniň döredilmelidiginiň wajypdygyny belledi.

Döwlet Baştutanymyz paýtagtymyz boýunça iş saparyny tamamlap, wise-premýere şäherde gurulýan ähli desgalaryň bellenilen möhletlerde tamamlanylmagyny we gurluşykda häzirki zamanyň tejribeleriniň ulanylmagyny, binalaryň ösen halkara ülňülerine laýyk derejede enjamlaşdyrylmagyny tabşyrdy. Paýtagtymyzda ýaýbaňlandyrylan giň gerimli gurluşyk ähli taraplaýyn häsiýete eýe bolmalydyr diýip, döwlet Baştutanymyz aýtdy we bu babatda wise-premýere anyk görkezmeleri berdi.