Şweýsariýanyň Lozanna şäherinde geçirilen dabarada Kirsti Kowentri resmi taýdan Halkara Olimpiýa Komitetiniň (HOK) prezidenti wezipesine girişdi.

2013-nji ýyldan bäri gurama ýolbaşçylyk eden HOK-yň öňki prezidenti Tomas Bah öz ygtyýarlyklaryny oňa geçirdi. Ol täze möhlete gaýtadan saýlanmak islemedi.
Kowentri bu wezipä 20-nji martda eýýäm birinji tapgyrda sesleriň aglaba köplügini alyp saýlandy. Ol Sebastýan Kou we Huan Antonio Samaranç-kiçi ýaly dalaşgärlerden öňe geçdi.
Zimbabweniň wekili HOK-yň onunjy Prezidenti we guramanyň taryhynda bu wezipede ilkinji zenan boldy.
Kirsti Kowentri Zimbabweniň iň köp titully türgenleriniň biri. Ol suwda ýüzmek boýunça iki gezek Olimpiýa çempiony, ençeme gezek dünýä çempiony we öňki dünýä rekordynyň eýesidir.