Düýn – 23-nji aprelde Arkadag şäherindäki Aba Annaýew adyndaky Halkara atçylyk akademiýasynda Halkara ahalteke atçylyk assosiasiýasynyň XV mejlisi geçirildi. Oňa Türkmenistanyň ugurdaş düzümleriniň ýolbaşçylary, assosiasiýanyň agzalary, ýurdumyzdan we daşary döwletlerden atşynaslar gatnaşdylar.

Mejlisiň gün tertibine assosiasiýa tarapyndan alnyp barlan işler, Türkmen bedewiniň milli baýramy mynasybetli ýurdumyzyň atşynaslaryna «Türkmenistanyň at gazanan atşynasy» diýen hormatly ady dakmak, assosiasiýa täze agzalary kabul etmek hem-de beýleki guramaçylyk meseleleri girizildi. Maslahata gatnaşyjylar Gahryman Arkadagymyzyň we hormatly Prezidentimiziň ýakyndan goldaw bermegi netijesinde assosiasiýanyň geçen döwürde dünýä boýunça ahalteke atlaryny ösdürip ýetişdirýän atçylyk toplumlarynyň ýolbaşçylaryny, belli atşynaslary, seýisleri özara birleşdirýän, olaryň özara hyzmatdaşlygyna ýardam edýän iri halkara düzüme öwrülendigini bellediler.