Garaşsyz Döwletleriň Arkalaşygynyň daşary işler ministrleriniň geňeşiniň wideomaslahat görnüşinde 12-nji maýda geçirilen nobatdaky mejlisiniň gün tertibine GDA-nyň işiniň esasy ugurlary boýunça netijeli hyzmatdaşlygy mundan beýläk-de ösdürmek, daşary syýasat edaralarynyň arasyndaky gatnaşyklary çuňlaşdyrmak bilen baglanyşykly meseleler girizildi.

Özüniň Bitaraplyk derejesine laýyklykda Türkmenistan GDA-nyň assosirlenen agzasy bolmak bilen, Arkalaşygyň çäklerindäki däp bolan dostlukly gatnaşyklara ygrarlydygyny görkezýär.

Daşary işler ministrleriniň geňeşiniň GDA-nyň daşary syýasat edaralarynyň ýolbaşçylarynyň, şeýle hem Garaşsyz Döwletleriň Arkalaşygynyň Ýerine ýetiriji Komitetiniň Başlygy — Ýerine ýetiriji sekretary S.Lebedewiň gatnaşmagynda geçirilen şu gezekki mejlisiniň dowamynda häzirki ýagdaýlary nazara almak bilen, Arkalaşygyň çäklerindäki sebit we halkara meseleleriniň we hyzmatdaşlygyň esasy ugurlary boýunça gyzyklanma bildirilýän pikir alyşmalar boldy, hyzmatdaşlygyň şertnamalaýyn hukuk binýadyna garaldy.

Duşuşygyň gün tertibine dürli pudaklardaky netijeli gatnaşyklary mundan beýläk-de işjeňleşdirmäge gönükdirilen resminamalaryň taslamalary hödürlenildi.

Mejlisiň jemleri boýunça birnäçe resminamalara, şol sanda «Garaşsyz Döwletleriň Arkalaşygynyň çäklerinde 2019-njy ýyl üçin daşary işler ministrlikleriniň köptapgyrly geňeşmeleriň Meýilnamasynyň ýerine ýetirilişi hem-de 2020-nji ýyl üçin Meýilnamasy hakynda», «Garaşsyz Döwletleriň Arkalaşygyna gatnaşyjy döwletleriniň 2021 — 2030-nji ýyllar üçin bedenterbiýe we sport babatynda hyzmatdaşlygynyň ösüşiniň Strategiýasy hakynda», «Arkalaşygyň medeni paýtagty» Döwletara maksatnamasynyň 2022-nji ýylda Gyrgyz Respublikasynda (Karakol ş.) amala aşyrylmagy hakynda» Çözgütlere gol çekildi.