Watan goragçylarynyň güni, şeýle hem Ýaragly Güýçleriň döredilmeginiň 34 ýyllygy mynasybetli  Türkmenistanyň Goranmak ministrliginiň Baş raýat goranyşy we halas ediş işleri müdirligi tarapyndan Aşgabat garnizonynyň harby bölümleriniň arasynda «Ezber halasgärler» atly bäsleşik geçirildi.

Bäsleşigiň esasy maksady çagyryş boýunça harby gullukçylaryň adatdan daşary ýagdaýlar ýüze çykan halatynda ilkinji lukmançylyk kömegini bermek we  dörän ýangynlary söndürmek boýunça ukyp-başarnyklaryny kämilleşdirmekden ybarat boldy. Şonuň ýaly-da, adatdan daşary ýagdaýlarda ýurt goragçylarynyň taýýarlyk ýagdaýyny kesgitlemek, fiziki taýýarlyklaryny barlamak hem-de olaryň raýat goranyşy we adatdan daşary ýagdaýlar boýunça bilimlerini artdyrmak bäsleşigiň esasy talaplarynyň hatarynda orun aldy.

Ezber halasgärleri saýlamagy göz öňünde tutýan bäsleşige gyzgalaňly häsiýet mahsus boldy. Çagyryş boýunça harby gullukçylar hünär endiklerini kämil ele alandyklaryny, çeýeliklerini, adatdan daşary ýagdaýlarda tiz netije çykarmagy başarýandyklaryny görkezdiler. Ýeňiji toparlara bäsleşigiň Göçme kubogy bilen Hormat hatlary, şeýle hem ýadygärlik sowgatlary gowşuryldy.

Annagül ATAÝEWA.