19-njy aprelde, dynç güni hormatly Prezidentimiz Gurbanguly Berdimuhamedow welosipedli ýörişi amala aşyryp, paýtagtymyzyň günorta künjeginde alnyp barylýan gurluşyk işlerini synlady.

Ir bilen milli Liderimiz Gurbanguly Berdimuhamedow «Ýanardag» binasynyň ýanynda welosipedli ýörişe başlady.

Hormatly Prezidentimiz soňky ýyllarda paýtagtymyzyň işewürlik merkeziniň kemala gelýän ýeri bolan günorta künjeginden Bitaraplyk binasyna tarap ugrady. Ýol ugra milli Liderimiz täze gurulýan binalary bilen şäheriň barha ajaýyp görnüşe gelýän keşbini synlady.

Diňe bir gözel binagärligi däl-de, ýadygärlikler toplumlary, heýkeller, özboluşly suw çüwdürim toplumlary, binalaryň daşky bezegleri şäheriň çeperçilik gurşawyny emele getirýär. Olaryň köpüsi ýurdumyzyň durmuşynda bolup geçýän möhüm wakalary we çäreleri beýan edýär. Häzirki wagtda Çandybil we Bekrewe şaýollarynyň çatrygynda Bütindünýä welosiped gününiň hormatyna bina edilýän ýadygärlik Aşgabadyň keşbini has-da gözelleşdirmäge ýardam berer.

Hormatly Prezidentimiz welosipedli ýörişiň dowamynda Aşgabadyň günorta tarapynda, bu künjekde gurluşygy alnyp barylýan desgalary synlady. Häzirki döwürde bu ýerde bina edilýän desgalaryň hatarynda Hökümet münberinden başga-da, Halk Maslahatynyň Diwanynyň binalar toplumy, Maslahatlar merkezi, kaşaň myhmanhana, şeýle hem «Türkmenbaşy» döwlet täjirçilik bankynyň we «Senagat» paýdarlar täjirçilik bankynyň edara binalary gurulýar.

Olar ýakyn geljekde ak mermerli paýtagtymyzyň nobatdaky ajaýyplyklaryna öwrülip, bir bitewi sazlaşygy emele getirerler. Döwlet Baştutanymyz welosipedli gidip barşyna şäheriň beýleki desgalary bilen sazlaşygy emele getirýän gurulýan binalaryň bezeg aýratynlyklaryna baha berdi.

Watanymyzyň hemişelik Bitaraplygynyň 25 ýyllygynyň uly dabaralara beslenjek 2020-nji ýylyň bahar paslynyň ajaýyp gününde hormatly Prezidentimiz Gurbanguly Berdimuhamedow welosipedde 20 kilometr ýol aşyp, Bitaraplyk binasynyň ýanynda welosipedli ýörişi tamamlady.