5-nji aprelda sanly wideoaragatnaşyk arkaly geçirilen Ministrler Kabinetiniň mejlisinde wise-premýer G.Myradow gözegçilik edýän edaralarynda işleriň ýagdaýy hem-de ätiýaçlandyryş işini kämilleşdirmek maksadynda görülýän anyk çäreler barada hasabat berdi. Şunuň bilen baglylykda, wise-premýer «Ätiýaçlandyryş hakynda» Türkmenistanyň Kanunyna laýyklykda gaýtadan işlenen «Ätiýaçlandyryş bilen baglanyşykly şikesiň agyrlyk derejesine laýyklykda tölenilmäge degişli ätiýaçlandyryş pul möçberini kesgitlemegiň tertibiniň» taýýarlanandygyny habar berdi.

Bu resminamanyň taslamasynda hereket edýän kanunçylygyň düzgünleri, bu ulgamda milli ykdysadyýetimiziň aýratynlyklary we halkara tejribesi nazara alyndy. Kadalaşdyryjy nama Saglygy goraýyş we derman senagaty ministrligi bilen ylalaşyldy.

Milli Liderimiz ýurdumyzyň önümçilik toplumlarynda tehniki hadysalaryň öňüni almagyň, işgärlere şikes ýetmegi bilen baglanyşykly ýagdaýlaryň döremezligini üpjün etmegiň döwlet ätiýaçlandyryş edaralarynyň öňünde durýan esasy wezipedigini belläp, bu ugurda alnyp barylýan işleriň döwrüň talabyna we halkara ölçeglerine laýyk derejede ýola goýulmalydygyny tabşyrdy.

Hormatly Prezidentimiz mümkinçiligi çäkli adamlar barada döwletimiz tarapyndan uly alada edilýändigini aýdyp, olaryň ýaşaýyş-durmuş şertlerini gowulandyrmak, ýaşaýyş jaýlarynda we beýleki desgalarda olar üçin amatly durmuş gurşawyny döretmek boýunça asylly işleriň geljekde-de dowam etdiriljekdigini belledi.

Ýurdumyzda ätiýaçlandyryş bazarynyň bäsdeşlige ukyplylygyny artdyrmagyň möhümdigini belläp, hormatly Prezidentimiz Gurbanguly Berdimuhamedow hödürlenen teklibi makullady hem-de degişli resminamanyň taslamasyny taýýarlamagy tabşyrdy.