Şu gün Türkmenistan «akylly» şäher konsepsiýasynyň ýörelgeleri esasynda gurlan Arkadag şäheriniň açylmagynyň iki ýyllygyny giňden belleýär. Şu mynasybetli bu şäherde dürli çäreler, şol sanda sergiler, baýramçylyk konserti geçirilýär.

Şanly sene mynasybetli Türkmenistanyň Prezidenti Serdar Berdimuhamedow Arkadag şäheriniň ähli ýaşaýjylaryna baýramçylyk Gutlagy bilen ýüzlendi.

2023-nji ýylyň 29-njy iýunynda Arkadag şäheriniň açylmagy bilen, ýurduň raýatlarynyň müňlerçesi täze iş orunlary, ähli amatlyklary bolan ýaşaýyş jaýlary bilen üpjün edildi. Şäheriň birinji tapgyrynda medeni-durmuş we beýleki maksatly desgalaryň 336-sy guruldy. Bu şäheriň hemmetaraplaýyn oňaýly jaýlarynda öýi dolandyrmakda sanly tehnologiýalar giňden ornaşdyrylan. Munuň özi ýaşaýjylaryň ösen durmuşyny üpjün edýär. Şäherde ýaşlaryň öz mümkinçiliklerini açyp görkezmekleri üçin ähli zerur şertler bar.

2023-nji ýylyň 16-njy iýunynda hormatly Prezidentimiz Serdar Berdimuhamedowyň gatnaşmagynda täze şäheriň gurluşygynyň ikinji tapgyrynyň düýbüni tutmak dabarasy boldy. Şonda şäheriň edaralaryna we guramalaryna dürli görnüşli awtoulag serişdeleri, şol sanda elektromobiller hem sowgat berildi.

Häzirki wagtda şäheriň gurluşygynyň ikinji tapgyryndaky işler depginli dowam edýär. Bu tapgyrda hem ähli amatlyklary bolan ýaşaýyş jaýlary, senagat-önümçilik desgalary, medeni-durmuş maksatly binalar gurlup, 2027-nji ýylda ulanmaga berler. Geçen ýyl «Arkadag şäherini 2024 – 2052-nji ýyllarda ösdürmegiň Konsepsiýasy» kabul edildi.

«Türkmenistan» gazetinde çap edilen maglumatlara görä, täze tapgyrda gurulýan desgalar, ýaşaýyş jaýlary şäheriň birinji tapgyryndakylar bilen sazlaşyp, olaryň üstüni ýetirer. Bu tapgyrda her biri 30 öýli, 5 gatly ýaşaýyş jaýlarynyň 36-sy, 40 öýli, 5 gatly ýaşaýyş jaýlarynyň 36-sy, 42 öýli, 7 gatly ýaşaýyş jaýlarynyň 24-si, şeýle-de 54 öýli, 9 gatly ýaşaýyş jaýlarynyň 14-si bina edilýär. Täze gurulýan 72 sany iki öýli, iki gatly kottejler toplumy hem olar bilen bitewi sazlaşygy emele getirýär. Umuman, häzirki wagtda bu ýerde 180-den gowrak ýaşaýyş jaýynyň gurluşygy batly depginlerde dowam edýär. Bu binalara hem «akylly» öý tehnologiýalary ornaşdyrylýar.

Ýaşaýjylaryň ähli durmuş zerurlyklary göz öňünde tutulyp, bilim-terbiýeçilik, söwda, hyzmat we beýleki maksatly desgalar ýaşaýyş toplumlaryna ýakyn aralykda ýerleşdirilendir. «Akylly» şäheriň gurluşygynyň ikinji tapgyrynda her biri 720 orunlyk umumybilim berýän mekdepleriň 5-si, 320 orunlyk çagalar baglarynyň 9-sy, saglyk öýi, ýangyna garşy göreş gullugynyň, Arkadag şäheriniň Gorjaw etrap häkimliginiň edara binalary, awtomenzil, demir ýol menzili, Çeper halyçylyk kärhanasy, Türkmen halysynyň we el işleriniň milli muzeýi, seýilgähler, söwda we hyzmat ediş toplumy bina ediler.

Arkadag şäherinde täze gurulýan metjidiň gurluşygynda, bezeg aýratynlyklarynda türkmen halkynyň ruhy dünýäsini alamatlandyrýan milli binagärlik usullary ulanylýar. Häzirden täze metjidiň minaralary uzaklardan seleňläp görünýär. Onuň içinde birbada müňlerçe adam namaza durup biler ýaly mümkinçilik dörediler. Şol sanda bu ýerde zenanlara niýetlenen ýer hem göz öňünde tutulandyr.

Döwrebap şäherde durnukly «ýaşyl» ykdysadyýete geçmegiň nusgasy hökmünde lukmançylyk klasteriniň önümçilik toplumyny döretmegiň maksatnamasy durmuşa geçirilýär. Iki tapgyryň ulag-kommunikasiýa ulgamlaryny, ähli inženerçilik düzümlerini birleşdirmekde sazlaşyklylygyň gazanylandygyny-da bellemek gerek.

Golaýda Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komiteti bilen Aziýanyň ösüş bankynyň arasynda gol çekilen özara düşünişmek hakynda Ähtnama laýyklykda, Arkadag şäherinde energetika, suw üpjünçiligi, şäher gurluşygy pudaklaryny ösdürmäge, bu babatda zerur bolan tehnologiýalary ornaşdyrmaga, suwy, energiýany tygşytlamaga, gaýtadan dikeldilýän energiýa çeşmelerini ösdürmäge, suwy gaýtadan ulanmaga, bu ugurlarda täze taslamalary işläp düzmekde we durmuşa geçirmekde öňdebaryjy tejribeleri alyşmak babatda hyzmatdaşlyk ýola goýulýar.

Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ştab-kwartirasynyň ýerleşmegi we bu ýerde dünýä ülňülerine laýyk gelýän saglygy goraýyş desgalarynyň toplumynyň döredilmegi, täze ýola goýulýan lukmançylyk maksatly önümçilikler Arkadag şäheriniň dünýä nusgalyk saglyk merkezi hökmündäki halkara abraýyny has-da belende göterýär.

Türkmen halkynyň Milli Lideri bu şähere yzygiderli iş saparlaryny amala aşyryp, häzirki zaman şähergurluşyk maksatnamasynyň üstünlikli durmuşa geçirilmegini berk gözegçilikde saklaýar. Täze şäheriň döwrebap ýaşaýyş jaýlaryna ilaty göçürip getirmek işleri alnyp barylýar. Arkadag şäheriniň hemmetaraplaýyn sazlaşykly ösüşi, şäher ilatynyň bagtyýar durmuşy we abadançylygy dünýäde uly seslenme tapýar.

Arkadag şäheri degişli Kanun esasynda döwlet ähmiýetli şäher diýen aýratyn hukuk derejesine eýe bolan şäherdir.