19-njy iýunda Daşary işler ministrliginde «Koronawirus ýokanjynyň pandemiýasyna garşy göreşmek boýunça häzirki ýagdaýlara syn» mowzugy boýunça nobatdaky brifing geçirildi. Bellenilişi ýaly, Saglygy goraýyş we derman senagaty ministrliginiň edaralary, hususan-da, Döwlet arassaçylyk-epidemiologiýa gullugy tarapyndan öňüni alyş we zyýansyzlandyryş işleri geçirilýär, möwsümleýin kesellere gözegçilik amala aşyrylýar. Serhet-geçiriş nokatlarynyň ählisinde dünýä ölçeglerine laýyk gelýän zyýansyzlandyryş desgalary guruldy. Taraplaryň ylalaşmagy boýunça şeýle terminallar goňşy ýurtlaryň çäginde hem döredilýär.

Saglygy goraýyş edaralarynda şahsy goranyş serişdelerini ulanmak, degişli raýatlar bilen işlenende, howpsuzlyk çärelerini berjaý etmek boýunça türgenleşik we tejribe okuwlary geçirilýär. Bütindünýä saglygy goraýyş guramasynyň goldaw bermeginde maý-iýun aýlarynda ýurdumyzyň ähli sebitleriniň epidemiologlary, reanimatologlary, ýokanç keselleri bejerýän lukmanlary üçin okuwlar geçirildi. Ilatyň arasynda wirusly keselleriň öňüni almak boýunça arassaçylyk-düşündiriş işleri yzygiderli geçirilýär, ýörite maglumat-bilim serişdeleri işlenip taýýarlanyldy.

Milli Liderimiz Gurbanguly Berdimuhamedowyň tabşyrygyna laýyklykda, diňe bir türkmenistanlylar üçin däl, eýsem, beýleki döwletleriň isleg bildirýän raýatlarynyň ählisi — Türkmenistanda işleýän diplomatik wekilhanalaryň we halkara agentlikleriň işgärleri üçin köpçülikleýin öňüni alyş lukmançylyk gözegçiligi guralýar.