Düýn  Medeniýet hepdeliginiň çäreleriniň çäklerinde Magtymguly adyndaky milli sazly drama teatrynda Türkmenistanyň Prezidentiniň «Türkmeniň Altyn asyry» atly baýragyny almak ugrundaky bäsleşigiň çäklerinde döredijilik bilen meşgullanýan ýaşlaryň arasynda yglan edilen «Pähim-paýhas ummany Magtymguly Pyragy» atly bäsleşigiň ýeňijilerini sylaglamak dabarasy geçirildi. Bu bäsleşigiň ýeňijileriniň beýik şahyrymyzyň doglan gününiň 300 ýyllygynyň giňden bellenilýän ýylynda dabaraly ýagdaýda sylaglanylmagy aýratyn many-mazmuna eýe boldy.

Ýeňijileriň hatarynda   Türkmenistanyň Goranmak ministrligine degişli harby bölümiň çagyryş boýunça harby gullukçysy Toýly Muhammetdurdyýewiň bolmagy has-da buýsandyryjydyr. Ýaş Watan goragçysy öz ýürek buýsanjyny şeýle beýan etdi: «Harby gullukçy hökmünde hormatly Belent Serkerdebaşymyzyň Şa serpaýyna mynasyp bolmak meniň üçin üýtgeşik duýgy boldy. Ynam bilen yhlas birikse, güýç-gaýrat bilen söýgi birikse ähli arzuwlar wysalyna gowuşýan eken. Biz – Watan goragçylary mundan beýläk hem, Milli Liderimiziň, hormatly Belent Serkerdebaşymyzyň belent ynamyndan ruhlanyp, Watanymyzyň asudalygyny goramak ugrunda harby gulluk borjumyzy döredijilik bilen utgaşykly ýagdaýda birkemsiz, göreldeli ýerine ýetireris».