Harby gulluk – diňe bir edermen Watan goragçylaryny taýýarlaýan, bedeniňi we ruhuňy taplaýan türgenleşiklerden ybarat däl. Türkmenistanyň Ýaragly Güýçleriniň harby bölümlerinde harby gullukçylaryň doly dynç almaklary we boş wagtlaryny gyzykly geçirmekleri üçin ähli şertler döredilendir. Milli goşunymyzyň hataryny ýazky çagyryş möwsüminiň dowamynda dolduran ýaş esgerler öz şahsy wagtlaryny nädip geçirýändikleri barada biziň habarçymyza gürrüň berdiler.

Hatarçy Ismail Ilýasow:

– Harby gullugyň gün tertibi gaty özüne çekiji. Biz gumanitar, fiziki, söweşjeň we nyzam taýýarlygyny geçýäris, tabşyryklary ýerine ýetirýäris. Emma bu biziň gün tertibimiziň diňe bir bölegi. Gündelik meýilnamamyza laýyklykda her gün bize azyndan iki sagat şahsy wagt berilýär – gündizki we agşamky naharlardan soň. Ol wagty biz kitapdyr žurnallary okamak, saz gurallaryny çalmak bilen geçirýäris. Meniň bilen gulluk edýän köp oglanlar örän zehinli. Olar bilen bilelikde biz döredijilik agşamlary üçin täze pikirleri oýlap tapýarys. Şeýle agşamlarda biz milli gahrymanlarymyzyň keşbini janlandyrýan sahnalary gurnaýarys, aýdym aýdýarys.

«Milli goşun».