Türkmen bedewi! Bu söz ata-babalarymyzyň ýaşaýşyny, durmuş mazmunyny, Watan düşünjesini özünde jemleýär. Ýyndamlykda, owadanlykda dünýäde deňi-taýy bolmadyk, wepadarlygyň we çydamlylygyň nusgasy, ýelden ýyndam, duýgur hem hüşgär, gursagy hyjuwdan doly gamyşgulak behişdi bedewler mydama türkmen halkynyň uçar ganaty bolupdyr. Merdana, gerçek ýigitleriň bolsa, wepaly söweş ýoldaşy we hem syrdaşy bolupdyr. Geçmişde türkmen ahalteke bedewleri söweşe gireninde, merdana gerçeklerimiziň göwünlerine giňlik berip, gursagynda ýeňşe bolan ynamy döredipdir.

Merdana halkymyzyň nesilbaşymyz Oguz han Türkmeniň döwründen başlap, şu günki güne çenli geçen şöhratly taryhy ýoluny bedew atsyz göz öňüne getirmek mümkin däl. «Çyn bedewler meýdanynda bellidir» diýýän halkymyzyň geçen taryhy ýolunyň egindeşi onuň gamyşgulak dal bedewleridir. Uçar laçyna, gylyk-häsiýetde gyza, wepalylykda bolsa dosta deňelen behişdi bedewler, merdana pederlerimiziň Watan, ar-namys, mukaddes toprak üçin alyp baran söweşlerinde taryhyň sahypalaryny şan-şöhrata besledi, Watany goran gerçekleriň wepaly söweş ýoldaşyna öwrüldi.

Berkarar döwletimiziň bagtyýarlyk döwründe hem bedew atlar merdana Watan goragçylarynyň hemdemine öwrüldi. Muňa mysal edip Türkmenistanyň Goranmak ministrliginiň atçylyk toplumyny görkezmek bolar. 2012-nji ýylda döredilen bu atçylyk toplumyna onçakly köp wagt geçmese-de, onuň gazanan üstünlikleri bu gün harby gullukçylaryň söweşjeň ruhuna ruh goşýar.

V müňýyllyk gadymy hem müdimi taryhymyza nazar aýlanyňda, türkmen ýigitleri at dabradyp, jyda parladypdyrlar. Üsti Tagty-Süleýmana deňelen bu bedew atlar her ýylky geçirilýän dabaraly harby ýörişlere, at çapyşyklaryna, atly sportuň konkur görnüşine, ahalteke atlarynyň gözellik bäsleşigine yzygiderli gatnaşdyrylýar.

Biziň köpimize mälim bolşy ýaly, Goranmak ministrliginiň atçylyk toplumynyň atlaryna atlanan Watan goragçylary ýurdumyza gelýän daşary ýurt wekillerini dabaraly ýagdaýda garşylaýarlar.

Atçylyk toparyna çapyksuwarlary Türkmenistanyň Ýaragly Güýçlerine çagyryş boýunça harby gullugy geçmäge gelýän esgerleriň içinden saýlanyp alynýar. Harby gulluga gelmezden ozal, bedew ata erk eden ýa-da seýisçilik bilen meşgullanan, harby gulluga çagyryşa degişli bolan raýatlar harby gullugyny öz söýgüli kärleri bilen dowam etdirmek mümkinçiligine eýe bolýarlar. Bu ýerde olar bedew ata erk etmegiň dürli tilsimlerini kämilleşdirýärler.

Hormatly Belent Serkerdebaşymyzyň halkymyza bagyş eden ajaýyp eýýamynda şöhratly bedewlerimiz toý-baýramlarymyzyň bezegi bolup, bagtyýar raýatlarymyzyň göwünlerine ganat berýär, ruhy dünýäsine gözellik çaýýar.

«Milli goşun».