15-nji iýunda Türkmenistanyň Konstitusiýa binasynyň öňündäki giň meýdançada Harby akademiýanyň şeýle hem harby we hukuk goraýjy edaralarynyň ýokary okuw jaýlarynyň uçurymlaryna okuwy üstünlikli tamamlanlygy barada diplomlaryň we döşe dakylýan nyşanlarynyň gowşurylyş dabarasy geçirildi.

Däp bolşy ýaly, dabaranyň başy uçurymlaryň Berdimuhamet Annaýew adyndaky 1-nji Ýöriteleşdirilen mekdebinde ýerleşýän hormatly Belent Serkerdebaşymyzyň mähriban atasy Berdimuhamet Annaýewiň heýkeline we «Halk hakydasy» ýadygärlikler toplumyna gül goýmak dabarasy bilen başlandy.

Ömründe birinji gezek serkerdäniň dabara lybasyny geýip gören uçurymlar resmi ýagdaýda, eginleri leýtenant harby derejesini dakyp köpçülige çykdylar.

Türkmenistanyň döwlet senasynyň ýaňlanmagy bilen başlanan dabara hormatly Belent Serkerdebaşymyzyň Gutlagynyň okalmagy bilen dowam etdi. Gutlagda «Siz geljekde hem Watanymyzyň we dünýäniň taryhynda öçmejek yz goýan şahsyýetleriň, türkmen halkynyň beýik ogullarynyň gahrymançylykly ýollaryny, söweş tärlerini we harby sungatyny mynasyp dowam etdirmelisiňiz»  diýilýär. Çünki, indi ýaş serkerdelere Ýaragly Güýçlerimiziň we beýleki goşun görnüşleriniň hatarynda ajaýyp zähmet ýoly garaşýar.

Serkerdelik ýoluna gadam goýjak uçurymlar diplomlaryny we döşe dakylýan nyşanlaryny kabul edip, mähriban Watanymyza, hormatly Belent Serkerdebaşymyza wepaly gulluk etjekdikleri barada kasam etdiler. Geçirilen bu çäre Alp-Arslan adyndaky döwlet teatrynyň sungat ussatlarynyň çykyşy we aýdymdyr sazlar bilen utgaşyp gitdi.

Dabara Harby akademiýanyň we harby we hukuk goraýjy edaralarynyň ýokary okuw jaýlarynyň uçurymlary tarapyndan ýerine ýetirilen Türkmenistanyň Milli kasamyny, şeýle-de münberiň öňünden geçilen dabaraly ýöriş bilen tamamlandy.

Suratlara «Multimediýa» bölüminden syn edip bilersiňiz!

«Milli goşun».