Ýakynlap gelýän Medeniýet we sungat işgärleriniň hem-de Magtymguly Pyragynyň şygryýet gününi ýokary derejede geçirmäge gönükdirilen taýýarlyk işleri, eýýämden, ýurt derejesinde giň gerim aldy.

Taryhda harby saz gurallary bilen meşhur bolan halkymyzyň Türkmenistanyň Ýaragly Güýçlerinde-de medeniýetiň hem-de sungatyň sarpasy belent tutulýar. Harby ulgamda yzygiderli geçirilýän medeni-köpçülik çärelerini, baýramçylyk mynasybetli guralýan dabaralary, konsertleri, döredijilik bäsleşiklerini muňa mysal edip görkezip bolar. Medeniýet we sungat işgärleriniň hem-de Magtymguly Pyragynyň şygryýet gününe bagyşlanyp «Arkadag» binasynda, şeýle hem «Magtymguly» seýilgähinde guralmagy meýilleşdirilýän medeni çäreler hem bu ugurda alnyp barylýan işleriň iň ýakyn mysallarydyr. «Magtymguly» seýilgähinde geçiriljek baýramçylyk dabarasy «Pyragyň arzuwlan zamany geldi» diýlip atlandyrylýar.

Türkmenistanyň Ýaragly Güýçleriniň «Göreldeli» harby orkestriniň, şeýle hem Türkmenistanyň Goranmak ministrliginiň Merkezi serkerdeler öýüniň «Merdana nesiller» aýdym-saz toparynyň aýdymçy, sazandalarynyň ýerine ýetirýän aýdym-sazlary harby ulgamda medeniýetiň-sungatyň barha rowaçlanmagyna itergi berýär. Bu orkestr hem-de aýdym-saz topary ýokarda agzalan iri dabaralarda hem medeni-köpçülik çäresine baýramçylyk ruhuny çaýar. Oňa gatnaşyjylaryň ruhuna ruh goşar, göwünlerini galkyndyrar.

Hawa, döredijilige sarpa – söze sarpa. Çünki ähli zadyň, ähli belentlikleriň, çuňluklaryň sakasynda söz bar. Onuň Alyhezreti söz bar. Söz bolsa türkmen üçin, onuň merdana ogullary üçin mukaddesdir. Çünki Watanyň gerçek ogullarynyň Kasamy-da söz bilen. Diýmek, Medeniýet we sungat işgärleriniň hem-de Magtymguly Pyragynyň şygryýet gününe görülýän taýýarlyk medeniýeti, sungaty, sözi ýene bir ýola, has belentden sarpalamaga görülýän taýýarlykdyr.

«Milli goşun».