Şu gün Türkmenistanyň Goranmak ministrliginiň Berdimuhammet Annaýew adyndaky 1-nji Ýöriteleşdirilen harby mekdebinde ministrlige degişli Wepaly atly gujurly alabaýyň «Ýylyň edermen türkmen alabaýy» atly halkara bäsleşikde ýeňiş gazanmagyna hem-de hormatly Prezidentimiziň Şa serpaýyna mynasyp bolmagyna bagyşlanyp, aýdym-sazly dabara geçirildi. Halkara parahatçylyk we ynanyşmak ýylynda merdana Watan goragçylarynyň baýramçylyk şatlygyny goşalandyran waka mynasybetli geçirilen dabaraly çärä harby gullukçylar, harby talyplar we harby okuwçylar gatnaşdylar.

Watançylyk, harby-gahrymançylyk ruhly aýdym-sazlara beslenen dabaraly çärede merdana Watan goragçylarynyň buýsançly çykyşlaryna giňden orun berildi. Çykyş edenleriň belleýşi ýaly, ýurdumyzda her ýylyň oktýabr aýynyň soňky ýekşenbesinde giňden bellenilýän Türkmen alabaýynyň baýramy mynasybetli çäreleriň çäklerinde geçirilýän «Ýylyň türkmen edermen alabaýy» atly halkara bäsleşik arassa ganly, gelşikli beden gurluşyna eýe tohum alabaýlary saýlap-seçmekde, olaryň başarjaňlygyna, üşükliligine, eýesiniň öwreden hereketlerini ýerine ýetirip bilmek ukybyna baha bermekde örän möhüm ähmiýete eýe ajaýyp gözden geçirilişdir. Milli Liderimiz Gahryman Arkadagymyzyň hem-de Türkmenistanyň Ýaragly Güýçleriniň Belent Serkerdebaşysy – Arkadagly Gahryman Serdarymyzyň tagallalary bilen indi birnäçe ýyldan bäri geçirilýän bäsleşik türkmen alabaýlarynyň şanyna tutulýan toýuň esasy çäreleriniň birine öwrüldi. Şu ýyl paýtagtymyzdaky Aşgabat atçylyk sport toplumynda geçirilen bäsleşikde Türkmenistanyň Goranmak ministrliginiň «Türkmen alabaýlary» merkezinde ýetişdirilen Wepaly atly alabaýyň ýeňiji bolmagy ýurdumyzyň Ýaragly Güýçlerinde edermen, gaýratly, naýbaşy ugra degişli, agrasdan üşükli häsiýeti bilen tapawutlanýan türkmen alabaýlarynyň köpeldilmegine, ýetişdirilmegine aýratyn ähmiýet berilýändigini görkezýär. 

Nygtalyşy ýaly, edermen türkmen alabaýlary ata-babalarymyzyň wepaly dosty, öý-ojagynyň ygtybarly goragçysy bolup gelipdir. Türkmen alabaýlarynyň harby we söweşjeň häsiýetlere eýe bolandygyna taryh şaýatdyr. Taryhy maglumatlarda, halk rowaýatlarynda alabaýlaryň merdanalygy, wepalylygy we islendik çylşyrymly pursatlarda öz janyny orta goýup, adamlary halas etmäge bolan ukyby barada aýdylýar. Watan goragy ugrunda mukaddes gullugy birkemsiz berjaý etmekde, ata mekanymyzyň çäklerini gözüň göreji deý goramakda, ýurdumyzyň harby howpsuzlygyny üpjün etmekde ýurt goragçylaryna türkmen alabaýlary wepaly ýoldaş hökmünde ýardam berýär. Garaşsyz, hemişelik Bitarap Türkmenistanymyzy goramakda türkmeniň alabaý itleriniň goşandy uludyr. Bular hakda Gahryman Arkadagymyzyň «Türkmen alabaýy» atly kitabynda giňişleýin söhbet edilýär. Gahryman Arkadagymyzyň adybir goşgusy bolsa türkmen alabaýlarynyň waspyny ýetirýän ylham çeşmesidir.

Söz sözlänler ýurdumyzda alabaýlaryň tohumynyň arassalygyny saklamak we olaryň köpeldilmegi ugrunda Türkmenistanyň Goranmak ministrliginiň «Türkmen alabaýlary» merkezinde hem giň gerimli işleriň alnyp barylýandygyny bellediler. Bu merkezde olary ýetişdirmäge türgenleşdirmäge, öwrenmäge ylmy esasda çemeleşilýär. Milli itşynaslykda halkymyzyň asyrlarboýy toplan tejribesi hem bu işde örän ýerlikli peýdalanylýar. Netijede, merkeziň harby gullukçylarydyr it idedijileri yhlasly zähmet çekip, bu işde asylly maksatlara ýetýärler. Şu ýylky halkara gözden geçirilişde Garagöz hem Sarygül diýen alabaýlaryň nesli bolan, 2021-nji ýylda doglan Wepaly atly alabaý hem ady agzalan merkezde ýetişdirilen saýlama, naýbaşy tohum itleriň biridir. Ol halkara bäsleşikde tiz hem takyk, eýesi bilen ysnyşykly hereketleri, gelşikli beden gurluşy, dogumlylygy bilen tapawutlanmagy başardy hem-de emin agzalarynyň ýokary bahasyna mynasyp boldy.

Ajaýyp toý gününde Türkmenistanyň Goranmak ministrligine degişli Wepaly atly türkmen alabaýynyň Türkmenistanyň Prezidentiniň Baş baýragy — «Toyota Camry V6» kysymly ýeňil awtoulag, ýörite medal, göçme kubok, diplom bilen sylaglanylmagy ähli Watan goragçylaryny buýsandyran taryhy waka öwrüldi. Bu naýbaşy ýeňiş harby gullukçylary Ýaragly Güýçlerimiziň düzüminde gadymyýetden janly miras, ynsanyň iň wepadar ýoldaşy hasaplanýan, edermenlikde, hüşgärlikde deň-taýy bolmadyk türkmen alabaýlarynyň arassa ganly nesil ugurlaryny köpeltmek, olary milli itşynaslygymyzyň gazananlaryny oňyn durmuşa geçirmek arkaly idetmek, şeýlelikde, milli buýsanjymyza öwrülen alabaýlar bilen Watanymyzyň goragyny birkemsiz alyp barmak ugrunda täze üstünliklere ruhlandyrdy.

Dabaraly çäräniň dowamynda ýurdumyzyň Ýaragly Güýçleriniň aýdym-saz toparlarynyň aýdymçy-sazandalary tarapyndan ýerine ýetirilen şowhunly çykyşlarda Milli Liderimiziň hem-de hormatly Prezidentimiziň durmuşa geçirýän il bähbitli, umumadamzat ähmiýetli beýik işleri, Watan goragynyň mukaddesligi, parahatçylyk söýüjilik, dünýäde barha şöhratlanýan türkmen alabaýlarynyň halkymyzyň durmuşyndaky mizemez orny, edermenligi belentden wasp edildi.

Toý ruhunda geçen aýdym-sazly dabaranyň ahyrynda oňa gatnaşyjylar milli mirasymyzyň aýrylmaz bölegi bolan türkmen alabaýlarynyň şan-şöhratyny dünýä ýaýýan, olaryň arassa ganly tohumlaryny köpeltmäge, ýetişdirmäge, milli itşynaslygymyzy ösdürmäge ähli mümkinçilikleri döredip berýän Milli Liderimize we ýurdumyzyň Ýaragly Güýçleriniň Belent Serkerdebaşysyna tüýs ýürekden alkyş sözlerini beýan etdiler.